पिंपरी, दि. ९ (pimpri chinchwad) – नवीन रिक्षा देण्याचे आमिष दाखवून एका व्यक्तीची एक लाख ५ हजार रुपयांची फसवणूक करण्यात आली. हा प्रकार वाकड येथील विनोदे वस्ती परिसरात उघडकीस आला आहे.
किशोर उर्फ सचिन सुधाकर बागडे (रा. लोहगाव, पुणे) असे गुन्हा दाखल करण्यात आलेल्या आरोपीचे नाव असून पोलीस त्याचा शोध घेत आहेत. विकास अभिमन्यु वाघमारे (वय ४३, रा. थेरगाव, पुणे) असे फसवणूक झालेल्या चालकाचे नाव असून त्यांनी बुधवारी (दि. ८ एप्रिल) रोजी याबाबत हिंजवडी पोलीस ठाण्यात फिर्याद दिली आहे.
ही घटना १० फेब्रुवारी २०२५ ते ८ एप्रिल २०२६ या कालावधीत वाकड येथे घडली. पोलिसांनी दिलेल्या माहितीनुसार, आरोपी किशोर बागडे याने फिर्यादी विकास वाघमारे यांना नवीन ऑटो रिक्षा देतो असे सांगून ५ हजार रुपये बुकिंग आणि १ लाख रुपये रोख घेतले. त्या बदल्यात ‘रिदम ऑटो’ शोरूमची बनावट पावती दिली.
फिर्यादीला विना परमिट आणि विना इन्शुरन्स रिक्षा दिल्याने त्यांनी आक्षेप घेतला. त्यानंतर आरोपीने ती रिक्षा जमा करून घेतली, मात्र भरलेले पैसे परत न देता फिर्यादीची आणि शोरूमची फसवणूक केली. हिंजवडी पोलीस या प्रकरणाचा तपास करत आहेत.
