दारू पिऊन वाहन चालवणे पडले महागात
पिंपरी, दि. ९ (pimpri chinchwad crime) – दारूच्या नशेत वाहन चालवणाऱ्या चालकावर न्यायालयाने कठोर कारवाई केली आहे. मोटार वाहन न्यायालयाने आरोपीस कारावास आणि दंडाची शिक्षा सुनावली आहे. या निर्णयामुळे बेदरकार वाहनचालकांना स्पष्ट इशारा मिळाला आहे.
ही घटना ३० ऑगस्ट २०२५ रोजी रात्री उशिरा घडली होती. एक ३१ वर्षीय व्यक्ती मद्यप्राशन करून वाहन चालवत होता. तो आळंदी परिसरातील मरकळ रोडवरून जात असताना वाहतूक पोलिसांच्या निदर्शनास आला. त्यावेळी त्याच्या वाहनाची तपासणी करण्यात आली.
दिघी-आळंदी वाहतूक विभागाने तत्काळ कारवाई केली. संबंधित चालकाविरुद्ध गुन्हा दाखल करण्यात आला. प्रकरण मोटार वाहन न्यायालय, शिवाजीनगर, पुणे येथे पाठवण्यात आले.
न्यायालयात सुनावणीदरम्यान वैद्यकीय तपासणी अहवाल महत्त्वाचा पुरावा ठरला.
आरोपी मद्याच्या प्रभावाखाली वाहन चालवत असल्याचे स्पष्ट झाले. त्यानंतर न्यायालयाने आरोपीस दोषी ठरवले.
न्यायदंडाधिकारी यांनी आरोपीस १५ दिवस साधा कारावास, मद्यप्राशन करून वाहन चालवल्याबद्दल आणखी १५ दिवस कारावास आणि १० हजार रुपयांचा दंड ठोठावण्यात आला. दंड न भरल्यास अतिरिक्त १० दिवस कारावासाची शिक्षा देण्यात आली आहे.
दोन्ही शिक्षा एकत्र भोगाव्या लागणार आहेत.
