पिंपरी, दि. २४ (प्रतिनिधी) – खेड तालुक्यातील कडाचीवाडी येथे पान मसाल्याच्या पुडीचे पैसे देण्यावरून झालेल्या वादात एका व्यक्तीला लाथाबुक्क्यांनी मारहाण करून पाय फॅक्चर केल्याचा धक्कादायक प्रकार समोर आला आहे. ही घटना १७ एप्रिल रोजी सायंकाळी साडेसहा वाजताच्या सुमारास गावठी हॉटेल येथे घडली.
संदिप हनुमंत कोतवाल (वय ३९, रा. कडाचीवाडी, ता. खेड, जि. पुणे) असे मारहाणीत गंभीर जखमी झालेल्या तरुणाचे नाव असून त्यांनी गुरुवारी (दि. २३ एप्रिल) रोजी दक्षिण चाकण पोलीस ठाण्यात फिर्याद दिली आहे. पोलिसांनी सिध्देश मुंगसे, संकेत मुंगसे (दोघे रा. कडाचीवाडी) आणि त्यांचे इतर दोन साथीदार (नाव, पत्ता माहिती नाही) यांच्या विरुद्ध गुन्हा दाखल केला आहे.
पोलिसांनी दिलेल्या माहितीनुसार, १७ एप्रिल रोजी सायंकाळी साडेसहा वाजताच्या सुमारास कडाचीवाडी येथील गावठी हॉटेलच्या पान टपरीवर पान मसाल्याच्या पैशावरून वाद झाला होता. या वादातून आरोपी संकेत मुंगसे व त्याच्या साथीदारांनी फिर्यादी संदीप कोतवाल यांना शिवीगाळ करत लाथाबुक्क्यांनी मारहाण केली. या मारहाणीत फिर्यादीच्या डाव्या पायाच्या घोट्याजवळ गंभीर दुखापत होऊन पाय फॅक्चर झाला. आरोपींनी त्यांना जीवे मारण्याची धमकीही दिली. दक्षिण चाकण पोलीस या प्रकरणाचा अधिक तपास करत आहेत.
