पुणे : हडपसर येथील ‘उषा किरण’ रुग्णालयात टायमर बॉम्ब आढळल्याच्या घटनेमुळे गुरुवारी शहरात मोठी खळबळ उडाली होती. या प्रकरणातील संशयित आरोपीला महाराष्ट्र दहशतवाद विरोधी पथकाने (एटीएस) अटक केली असून नागपूर रेल्वे स्थानकावरून त्याला ताब्यात घेण्यात आले. शिवाजी राठोड (वय अंदाजे ३५) असे आरोपीचे नाव असून तो मूळचा सोलापूर जिल्ह्यातील रहिवासी आहे. सध्या तो पुण्यात वास्तव्यास होता.
एटीएसच्या सूत्रांनी दिलेल्या माहितीनुसार, राठोडने रुग्णालय परिसरात बॉम्ब ठेवल्यानंतर रेल्वेने नागपूरकडे पलायन केले होते. तपासादरम्यान पोलिसांनी सोलापूर आणि नागपूर या दोन्ही ठिकाणी शोधमोहीम राबवली. आरोपीने दिशाभूल करण्याच्या उद्देशाने विविध ठिकाणांची रेल्वे तिकिटे काढल्याचे प्राथमिक तपासात समोर आले आहे.
घटनेनंतर पुणे पोलिसांसह एटीएसने सीसीटीव्ही चित्रफिती, रेल्वे प्रवासाची माहिती आणि तांत्रिक पुराव्यांच्या आधारे तपासाची चक्रे वेगाने फिरवली. त्यानंतर नागपूर रेल्वे स्थानकावर सापळा रचून आरोपीला ताब्यात घेण्यात आले.
दरम्यान, राठोडला पुढील चौकशीसाठी पुणे पोलिसांच्या ताब्यात देण्यात येणार असून, बॉम्ब ठेवण्यामागील हेतू, त्याला कोणी मदत केली का, तसेच या प्रकरणाचे अन्य कोणते दुवे आहेत का, याचा तपास सुरू आहे.
