तळेगाव दाभाडे :
मनासारखी नोकरी मिळत नसल्याने आणि वय वाढत चालले तरी लग्न जमत नसल्याने आलेल्या तीव्र नैराश्यातून एका ३२ वर्षीय तरुणाने झाडाला दोरीच्या सहाय्याने गळफास लावून आपली जीवनयात्रा संपवल्याची धक्कादायक घटना समोर आली आहे. इंदोरी (मावळ) येथील ऐतिहासिक व पवित्र अशा भंडारा डोंगर जवळील परिसरातही घटना घडली.
परमेश्वर रामेश्वर कुरे (वय ३२, सध्या रा. देहू गाव, मूळ रा. आलापूर, ता. माजलगाव, जि. बीड) असे आत्महत्या केलेल्या दुर्दैवी तरुणाचे नाव आहे.
भंडारा डोंगर परिसरात खळबळ
मिळालेल्या माहितीनुसार, परमेश्वर कुरे हा तरुण मूळचा बीड जिल्ह्यातील माजलगावचा रहिवासी होता, मात्र सध्या तो देहू गावात वास्तव्यास होता. इंदोरी मावळ येथील भंडारा डोंगर परिसरातील एका झाडाला दोरीने गळफास घेतलेल्या अवस्थेत त्याचा मृतदेह आढळून आला. हा प्रकार समोर येताच परिसरात एकच खळबळ उडाली. नागरिकांनी तातडीने या घटनेची माहिती स्थानिक पोलिसांना दिली.
नातेवाईकांचा पोलिसांसमोर खुलासा; ‘ते’ दोन प्रश्न ठरले जीवघेणे
या धक्कादायक घटनेबाबत तळेगाव दाभाडे एमआयडीसी पोलीस स्टेशनचे वरिष्ठ पोलीस निरीक्षक संतोष पाटील यांनी माहिती दिली. पोलिसांनी परमेश्वरच्या नातेवाईकांकडे चौकशी केली असता, त्याच्या आत्महत्येचे कारण समोर आले. परमेश्वर हा सुशिक्षित होता, मात्र गेल्या काही काळापासून त्याला त्याच्या मनासारखी नोकरी मिळत नव्हती. त्यातच त्याचे लग्नही जमत नसल्याने तो मानसिक दडपणाखाली होता. या दोन्ही विवंचनेतून त्याला प्रचंड नैराश्य आले होते. त्याने आपल्या नातेवाईकांजवळ आत्महत्येचा विचार बोलून दाखवला होता. याच नैराश्यातून त्याने हे टोकाचे पाऊल उचलले असावे, असा प्राथमिक अंदाज नातेवाईकांनी पोलिसांशी बोलताना व्यक्त केला आहे.
पोलीस तपास सुरू
घटनास्थळाचा पंचनामा करून पोलिसांनी मृतदेह शवविच्छेदनासाठी पाठवला आहे. या प्रकरणी तळेगाव एमआयडीसी पोलीस स्टेशनमध्ये आकस्मिक मृत्यूची नोंद करण्यात आली असून, पुढील तपास पोलीस करत आहेत.
तरुण मुलगा, त्यात रोजगाराचा आणि लग्नाचा प्रश्न, या सामाजिक आणि मानसिक विवंचनेतून बीडच्या एका तरुणाने पुण्यात येऊन आपले जीवन संपवल्याने त्याच्या मूळ गावासह देहू परिसरात हळहळ व्यक्त केली जात आहे.
