ठाकरे गटाला मोठा धक्का; सचिन अहिर यांनी शिवबंधन सोडले, शिवसेनेकडून विधान परिषद उपसभापतीपदासाठी उमेदवारी

मुंबई : महाराष्ट्राच्या राजकारणात पुन्हा एकदा मोठी उलथापालथ झाली असून, शिवसेना (उद्धव बाळासाहेब ठाकरे) पक्षाचे विधान परिषद आमदार सचिन अहिर यांनी पक्षाला रामराम ठोकत उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केला आहे. यानंतर त्यांनी शिवसेनेकडून विधान परिषदेच्या उपसभापतीपदासाठी उमेदवारी अर्ज दाखल केला. या घडामोडीमुळे ठाकरे गटाला मोठा राजकीय धक्का बसल्याची चर्चा राजकीय वर्तुळात सुरू झाली आहे.

विशेष म्हणजे, उद्धव ठाकरे हे सध्या पक्ष सोडून गेलेल्या खासदारांच्या मतदारसंघांमध्ये पक्षबांधणीसाठी दौरे करत असतानाच, त्यांचे पुत्र आदित्य ठाकरे यांच्या वरळी विधानसभा मतदारसंघातील सर्वात प्रभावशाली नेत्यांपैकी एक असलेल्या सचिन अहिर यांनीच पक्ष सोडल्याने या घडामोडीला विशेष महत्त्व प्राप्त झाले आहे.

वरळीतील समीकरणांवर परिणाम?

वरळी विधानसभा मतदारसंघात सचिन अहिर यांचे मजबूत संघटन आणि कामगार वर्गावर प्रभाव असल्याचे मानले जाते. २०१९ आणि २०२४ च्या विधानसभा निवडणुकांमध्ये आदित्य ठाकरे यांच्या विजयामागे अहिर यांनी महत्त्वाची भूमिका बजावल्याचे राजकीय विश्लेषक सांगतात. त्यामुळे त्यांच्या पक्षांतराचा वरळीतील भविष्यातील राजकीय समीकरणांवर परिणाम होण्याची शक्यता व्यक्त केली जात आहे.

शिवसेनेचे ‘ऑपरेशन टायगर’ वेगात?

अलीकडेच ठाकरे गटातील काही खासदारांनी शिवसेनेत प्रवेश केल्यानंतर आता सचिन अहिर यांच्या पक्षांतरामुळे शिंदे गटाचे संघटनात्मक बळ आणखी वाढल्याचे मानले जात आहे. आगामी स्थानिक स्वराज्य संस्था आणि इतर निवडणुकांच्या पार्श्वभूमीवर ही घडामोड राजकीयदृष्ट्या महत्त्वाची मानली जात आहे.

कोण आहेत सचिन अहिर?

सचिन अहिर यांनी आपल्या सार्वजनिक जीवनाची सुरुवात १९९३ मध्ये राष्ट्रीय मिल मजदूर संघातून केली. सचिवपदापासून सुरुवात करत त्यांनी पुढे अध्यक्षपदाची जबाबदारी सांभाळली. १९९६ पासून ते महाराष्ट्र राज्य राष्ट्रीय कामगार संघाचे प्रमुख राहिले. माझगाव डॉक, महिंद्रा अँड महिंद्रा यांसारख्या उद्योगांतील कामगार संघटनांचे नेतृत्व करत त्यांनी अनेक वेतन करार घडवून आणले आणि कामगार चळवळीत स्वतंत्र ओळख निर्माण केली.

राष्ट्रवादी काँग्रेस ते शिवसेना… आणि आता शिंदे गट

१९९९ मध्ये राष्ट्रवादी काँग्रेसच्या तिकिटावर ते प्रथमच आमदार झाले. त्यानंतर २००४ आणि २००९ मध्येही त्यांनी विजय मिळवला. काँग्रेस-राष्ट्रवादी आघाडी सरकारमध्ये त्यांनी गृहनिर्माण राज्यमंत्री म्हणून काम केले. राष्ट्रवादी काँग्रेसचे मुंबई अध्यक्ष म्हणूनही त्यांनी जबाबदारी सांभाळली.

२०१९ च्या विधानसभा निवडणुकीपूर्वी त्यांनी राष्ट्रवादी काँग्रेस सोडून तत्कालीन एकसंध शिवसेनेत प्रवेश केला. त्यानंतर २०२० मध्ये त्यांची शिवसेनेच्या उपनेतेपदी नियुक्ती झाली. २०२२ मध्ये उद्धव ठाकरे यांनी त्यांना विधान परिषदेवर संधी दिली.

राजकीय चर्चांना उधाण

सचिन अहिर यांचे पक्षांतर हे केवळ एका आमदाराचे पक्षांतर नसून, मुंबईतील विशेषतः वरळी परिसरातील राजकीय समीकरणांवर परिणाम करणारी घडामोड मानली जात आहे. विधान परिषद उपसभापतीपदासाठी त्यांची उमेदवारी आणि त्यामागील राजकीय संदेश यावर आता सर्वांचे लक्ष लागले आहे. आगामी काळात ठाकरे गट या धक्क्यातून कशी सावरणार आणि शिंदे गट या घडामोडीचा किती राजकीय लाभ घेणार, हे पाहणे महत्त्वाचे ठरणार आहे.