अमेरिका आणि इराण यांच्यातील तणावाने पुन्हा एकदा गंभीर वळण घेतले असून मध्यपूर्वेत युद्धजन्य परिस्थिती निर्माण झाली आहे. स्ट्रेट ऑफ होर्मुझमध्ये तीन व्यावसायिक जहाजांवर हल्ला झाल्यानंतर अमेरिकेने सलग दुसऱ्या रात्री इराणमधील विविध लष्करी आणि धोरणात्मक ठिकाणांवर हवाई हल्ले केले आहेत. होर्मुझ सामुद्रधुनीतील आंतरराष्ट्रीय सागरी वाहतूक सुरक्षित ठेवण्यासाठी ही कारवाई करण्यात आल्याचा दावा अमेरिकेच्या सेंट्रल कमांडने केला आहे.
अमेरिकेच्या हवाई कारवाईनंतर इराणने तीव्र निषेध नोंदवत याला आंतरराष्ट्रीय कायद्याचे उल्लंघन असल्याचे म्हटले आहे. तसेच या कारवाईला योग्य वेळी आणि योग्य पद्धतीने प्रत्युत्तर दिले जाईल, असा कठोर इशाराही इराणने दिला आहे. या वाढत्या तणावामुळे संपूर्ण आखाती प्रदेशात हाय अलर्ट जारी करण्यात आला आहे.
दरम्यान, संभाव्य हल्ल्याच्या भीतीमुळे बहरीन आणि कुवैतमध्ये एअर रेड सायरन वाजवण्यात आले. होर्मुझ सामुद्रधुनीजवळील बंदर अब्बास, बुशेहर, चाबहार आणि अबू मूसा बेट परिसरात स्फोटांचे आवाज ऐकू आल्याची माहिती स्थानिक माध्यमांनी दिली आहे. या घडामोडींमुळे परिसरातील नागरिकांमध्ये भीतीचे वातावरण निर्माण झाले आहे.
या संघर्षाच्या पार्श्वभूमीवर अमेरिकेने पश्चिम आशियात २० हून अधिक युद्धनौका आणि अतिरिक्त लष्करी संसाधने तैनात केली आहेत. दुसरीकडे, जागतिक स्तरावर कच्च्या तेलाच्या पुरवठ्यावर परिणाम होण्याची शक्यता व्यक्त केली जात असून, आंतरराष्ट्रीय बाजारात तेलाच्या किमती वाढू लागल्या आहेत.
इराणने अमेरिकेचे राष्ट्राध्यक्ष डोनाल्ड ट्रम्प यांच्यावर पूर्वीच्या करारांचे उल्लंघन केल्याचा आरोप केला आहे. या वाढत्या संघर्षामुळे मध्यपूर्वेतील सुरक्षेची परिस्थिती अधिकच चिंताजनक बनली असून, जगभरातील देश या घडामोडींवर बारकाईने लक्ष ठेवून आहेत.
