पिंपरी-चिंचवड ः
पावसाळ्याच्या पार्श्वभूमीवर डेंग्यू, मलेरिया तसेच इतर संसर्गजन्य आजारांचा संभाव्य धोका लक्षात घेऊन पिंपरी-चिंचवड महानगरपालिकेने कंबर कसली आहे. शहरातील नागरिकांच्या आरोग्याचे रक्षण करण्यासाठी महापालिकेकडून संपूर्ण शहरभर स्वच्छता, जनजागृती आणि डास नियंत्रणाची व्यापक मोहीम युद्धपातळीवर राबविण्यात येत आहे.
डासांची उत्पत्ती रोखण्यासाठी ‘ड्राय डे’ पाळा!
पावसाळ्यात साचलेले पाणी, अस्वच्छ परिसर तसेच दूषित अन्न व पाण्यामुळे संसर्गजन्य आजारांचा प्रसार होण्याची शक्यता सर्वाधिक असते. त्यामुळे नागरिकांनी घर व परिसर स्वच्छ ठेवावा, पाणी साचणार नाही याची काळजी घ्यावी, पिण्याचे पाणी उकळून किंवा शुद्ध करून वापरावे आणि अन्नपदार्थ नेहमी झाकून ठेवावेत, असे आवाहन महापालिकेने केले आहे.
डासांची उत्पत्ती रोखण्यासाठी खालील गोष्टींची नियमित स्वच्छता करणे आवश्यक आहे:
पाण्याच्या टाक्या, कुलर आणि फुलदाण्या नियमित स्वच्छ कराव्यात.
परिसरातील जुने टायर, रिकाम्या बाटल्या किंवा इतर वस्तूमध्ये पाणी साचू देऊ नये.
नागरिकांनी आठवड्यातून किमान एकदा आपल्या घरात ‘ड्राय डे’ पाळावा
पाणी साचणाऱ्या जागांची तपासणी करावी.
महापालिकेचे ऑन-फील्ड नियोजन
फवारणी व फॉगिंग: डासांचा नायनाट करण्यासाठी शहरभर नियमित अळीनाशक औषधांची फवारणी आणि धूर फवारणी (फॉगिंग) केली जात आहे.
घरोघरी सर्वेक्षण: महापालिकेचे कर्मचारी घरोघरी जाऊन डास उत्पत्ती स्थानांचा शोध घेत असून नागरिकांमध्ये जनजागृती करत आहेत.
वैद्यकीय सज्जता: महापालिकेच्या सर्व रुग्णालयांमध्ये आणि प्राथमिक आरोग्य केंद्रांमध्ये संशयित रुग्णांची तपासणी व उपचारांची विशेष सुविधा उपलब्ध करण्यात आली आहे.
”पावसाळी आजारांवर प्रभावी नियंत्रण मिळविण्यासाठी महापालिकेच्या उपाययोजनांसोबतच नागरिकांचे सक्रिय सहकार्य अत्यंत आवश्यक आहे. ताप, अंगदुखी, उलट्या, जुलाब किंवा इतर कोणतीही संशयास्पद लक्षणे आढळल्यास स्वतःच्या मनाने औषधोपचार न करता, विलंब न करता जवळच्या आरोग्य केंद्रात जाऊन वैद्यकीय सल्ला घ्यावा.”
– रवि लांडगे, महापौर, पिंपरी-चिंचवड
—
”पावसाळ्यात डेंग्यू, मलेरिया आणि इतर संसर्गजन्य आजारांचा धोका वाढत असल्याने प्रत्येक नागरिकाने स्वच्छता आणि प्रतिबंधात्मक उपायांना सर्वोच्च प्राधान्य दिले पाहिजे. घर आणि परिसरात पाणी साचू न देणे व डासांची उत्पत्ती रोखणे ही प्रत्येकाची जबाबदारी आहे. नागरिकांनी जागरूक राहून महापालिकेच्या मोहिमेला सहकार्य करावे.”
– डॉ. विजय सूर्यवंशी, आयुक्त, पीसीएमसी
