Delhi – उपोषणावर ठाम सोनम वांगचुक; उपचारांनाही नकार, डिहायड्रेशनची लक्षणे वाढल्याची डॉक्टरांची माहिती
नवी दिल्ली : प्रतिनिधी
सामाजिक कार्यकर्ते आणि पर्यावरणवादी सोनम वांगचुक यांच्या प्रकृतीबाबत सफदरजंग रुग्णालय प्रशासनाने महत्त्वाची माहिती दिली आहे. रुग्णालयाच्या वैद्यकीय अधीक्षक डॉ. चारू बांबा यांनी सांगितले की, सोनम वांगचुक यांना आज सकाळी ७.३० वाजता रुग्णालयात दाखल करण्यात आले असून, ते अद्यापही उपोषणावर ठाम आहेत. आवश्यक वैद्यकीय उपचारांचा सल्ला देऊनही त्यांनी उपचार घेण्यास नकार दिला आहे.
डॉ. चारू बांबा यांनी सांगितले की, सध्या सोनम वांगचुक यांचा रक्तदाब, नाडीचा वेग आणि ऑक्सिजनची पातळी स्थिर आहे. ते पूर्णपणे शुद्धीत असून त्यांच्या प्रकृतीबाबत जागरूक आहेत. मात्र, त्यांच्या शरीरात डिहायड्रेशनची स्पष्ट लक्षणे दिसून येत असून त्यांना तातडीने उपचारांची गरज आहे.
रुग्णालय प्रशासनाने त्यांना ओरल रिहायड्रेशन सोल्यूशन (ORS), इलेक्ट्रोलाइट द्रावण तसेच शिरामार्गे (IV) द्रवपदार्थ देण्याचा सल्ला दिला. मात्र, वारंवार समुपदेशन करूनही त्यांनी कोणत्याही प्रकारची फ्लुइड थेरपी स्वीकारण्यास नकार दिल्याची माहिती डॉक्टरांनी दिली.
दिल्ली उच्च न्यायालयाच्या निर्देशानुसार अखिल भारतीय आयुर्विज्ञान संस्था (AIIMS) येथील आपत्कालीन वैद्यकीय विभागाचे अतिरिक्त प्राध्यापक डॉ. अक्षय कुमार यांचाही उपचार पथकात समावेश करण्यात आला आहे. त्यांनी सोनम वांगचुक यांची तपासणी करून वैद्यकीय इतिहासाचा आढावा घेतला असून, त्यांनी दिलेले वैद्यकीय मत सफदरजंग रुग्णालयाच्या डॉक्टरांच्या निष्कर्षाशी सुसंगत असल्याचे स्पष्ट करण्यात आले.
सोनम वांगचुक यांच्या प्रकृतीवर वैद्यकीय पथकाकडून सातत्याने लक्ष ठेवण्यात येत असून, त्यांना उपचार आणि द्रवपदार्थ स्वीकारण्यासाठी सतत समजावण्याचे प्रयत्न सुरू असल्याचे रुग्णालय प्रशासनाने सांगितले.
