पिंपरी, दि. २८(Pimpri chinchwad crime)- मोठ्या रकमेचे कर्ज मंजूर करून देण्याचे आमिष दाखवून एका व्यावसायिकाची २ लाख ८५ हजार रुपयांची आर्थिक फसवणूक करण्यात आली. ही घटना पिंपरी येथील कमला क्रॉस बिल्डिंगमध्ये उघडकीस आली आहे.
याप्रकरणी किरण भालचंद्र सुर्यवंशी (वय ४८, रा. निगडी) यांनी शुक्रवारी (दि. २७) पिंपरी पोलीस ठाण्यात फिर्याद दिली आहे. पोलिसांनी गणेश एकनाथ सुर्यवंशी (रा. पिंपळे गुरव, पुणे) याच्याविरुद्ध गुन्हा दाखल केला आहे. ही घटना ५ जुलै २०२३ ते २५ जून २०२५ या कालावधीत पिंपरी येथे घडली.
पोलिसांनी दिलेल्या माहितीनुसार, आरोपी गणेश याने फिर्यादीला ‘जन विकास कम्युनिटी प्रा. लि.’ या बँकेकडून ५० लाख रुपयांचे मालमत्ता तारण कर्ज आठ दिवसात काढून देतो असे आश्वासन दिले होते. कर्ज मंजुरीच्या प्रक्रियेसाठी त्याने फिर्यादीकडून वेळोवेळी तीन लाख ५५ हजार रुपये घेतले. मात्र, कोणतेही कर्ज मंजूर न करता त्याने त्यातील केवळ ७० हजार रुपये परत केले. उर्वरित २ लाख ८५ हजार रुपये मागितले असता आरोपीने फिर्यादीला शिवीगाळ करून जीवे मारण्याची धमकी दिली.
या प्रकरणाचा पुढील तपास पोलीस उपनिरीक्षक दलालवाड करीत आहेत.
