पिंपरी-चिंचवड, दि.१२ (pimpri chinchwad crime)विनयभंगाच्या छळाला कंटाळून पीएचडी विद्यार्थिनीची आत्महत्या; मार्गदर्शक प्राध्यापक अटकेत
मानसिक त्रास, गैरवर्तनाचे आरोप; चिठ्ठीत धक्कादायक खुलासा
शैक्षणिक क्षेत्राला हादरवणारी घटना पिंपरी-चिंचवडमध्ये उघडकीस आली आहे. विनयभंग आणि मानसिक छळाला कंटाळून एका पीएचडी विद्यार्थिनीने आत्महत्या केल्याची धक्कादायक घटना घडली. या प्रकरणी मार्गदर्शक प्राध्यापकाला अटक करण्यात आली आहे.
या प्रकरणात बोटॅनिकल सर्व्हे ऑफ इंडियामधील सहाय्यक संचालक डॉ. ए. बिन्नियमिन (वय ५०, रा. धानोरी, पुणे) याला पोलीसांनी अटक केली आहे. आत्महत्या केलेल्या ३० वर्षीय विद्यार्थिनीच्या वडिलांनी भोसरी एमआयडीसी पोलीस ठाण्यात फिर्याद दिली आहे.
शनिवारी (११ एप्रिल) शाहूनगर येथील राहत्या घरी विद्यार्थिनीने गळफास घेत आत्महत्या केली. ती बॉटनी विषयात पीएचडीचे शिक्षण घेत होती. डॉ. बिन्नियमिन हे तिचे मार्गदर्शक होते.
आत्महत्येपूर्वी विद्यार्थिनीने लिहिलेल्या चिठ्ठीत गंभीर आरोप करण्यात आले आहेत. ऑगस्ट २०२५ पासून आरोपी प्राध्यापकाकडून गैरवर्तन आणि मानसिक छळ सुरू होता, असे नमूद करण्यात आले आहे. या त्रासाला कंटाळून टोकाचे पाऊल उचलल्याचे तिने लिहिले आहे.
विशेष म्हणजे, आत्महत्येच्या दोन दिवस आधी आरोपीने स्टॅम्प पेपरवर माफीपत्र दिले होते. पुन्हा असा प्रकार करणार नसल्याचे त्यात नमूद होते. मात्र, विद्यार्थिनी मानसिक धक्क्यातून सावरू शकली नाही.
या प्रकरणामुळे शैक्षणिक वर्तुळात खळबळ उडाली आहे. आरोपीला न्यायालयात हजर करण्यात आले असता, त्याला १५ एप्रिलपर्यंत पोलीस कोठडी सुनावण्यात आली आहे.
या घटनेचा तपास पोलीस निरीक्षक भोजराज मिसाळ करत आहेत.
