पुणे : मे महिन्याच्या सुरुवातीलाच पुणे जिल्ह्याला उन्हाच्या तीव्र झळा बसू लागल्या असून तापमानाचा पारा सातत्याने वर सरकत आहे. आज जिल्ह्यामध्ये सर्वाधिक तापमानाची नोंद बारामती येथे झाली असून, तेथील पारा ४०.१ अंश सेल्सिअसवर पोहोचला आहे. यामुळे बारामतीकरांना कडाक्याच्या उन्हाचा सामना करावा लागत आहे.
जिल्ह्यातील विविध भागांत तापमानात मोठी तफावत दिसून येत असली तरी दुपारच्या वेळी रस्ते ओस पडत असल्याचे चित्र आहे. पुणे शहरातील प्रमुख भागांचा विचार करता मगरपट्टा येथे ३७.७ अंश, शिवाजीनगर येथे ३७.० अंश आणि कोरेगाव पार्क येथे ३६.८ अंश सेल्सिअस तापमानाची नोंद झाली आहे. हडपसर आणि वडगाव शेरी या भागांतही तापमान ३५.७ अंशांपर्यंत पोहोचले आहे.
चिंचवड आणि मावळ परिसरातही उष्णता
उद्योगनगरी चिंचवडमध्ये आज ३६.१ अंश सेल्सिअस तापमानाची नोंद झाली. त्यामानाने तळेगाव परिसरात हवामान काहीसे सुसह्य असून तिथे ३५.२ अंश सेल्सिअस पारा राहिला. ग्रामीण भागात शिरूर (३५.६ अंश), राजगुरुनगर (३५.८ अंश) आणि नारायणगाव (३४.५ अंश) अशा तापमानाची नोंद करण्यात आली आहे.
दौंड आणि हवेलीतही चटके
बारामतीपाठोपाठ दौंडमध्ये ३७.९ अंश आणि हवेली परिसरात ३७.६ अंश सेल्सिअस तापमानामुळे नागरिक हैराण झाले आहेत. उन्हाची ही वाढती तीव्रता पाहता नागरिकांनी दुपारच्या वेळी घराबाहेर पडताना काळजी घ्यावी आणि जास्तीत जास्त पाणी पिण्याचे आवाहन प्रशासनाकडून करण्यात येत आहे. आगामी काही दिवसांत जिल्ह्याचा पारा अजून वाढण्याची शक्यता हवामान खात्याकडून वर्तवण्यात आली आहे.
