२५ हजारांच्या सोन्यासाठी नात्यातील वृद्धेचा निर्घृण खून; पुरावा नष्ट करण्यासाठी मृतदेह गोणीत भरून नदीपात्रात फेकला

पिंपरी, दि. ९ (प्रतिनिधी) –
दागिने आणि पैशांच्या लालसेपोटी एका नराधमाने नात्यातील ८० वर्षीय वृद्ध महिलेचा गळा दाबून खून केल्याची धक्कादायक घटना खेड तालुक्यातील करंजविहीरे येथे उघडकीस आली आहे. आरोपीने खुनानंतर पाप लपवण्यासाठी मृतदेह प्लास्टिकच्या गोणीत भरून भामा नदीच्या पात्रात फेकून दिला होता. या घटनेने परिसरात तीव्र संताप व्यक्त केला जात आहे.
​या प्रकरणी आरोपी कैलास कुंडलिक मरगज (वय ३६, रा. करंजविहीरे, ता. खेड, जि. पुणे) याला पोलिसांनी अटक केली आहे. फिर्यादी समीर बाळू मरगज (वय २७, रा. करंजविहीरे, ता. खेड) यांनी महाळुंगे एमआयडीसी पोलीस ठाण्यात यासंदर्भात तक्रार दाखल केली आहे. सिंधुबाई विठोबा मरगज (वय ८०) असे खून झालेल्या वृद्ध महिलेचे नाव आहे.
​पोलिसांनी दिलेल्या माहितीनुसार, दिनांक २ मे २०२६ रोजी रात्री ८:०० वाजेच्या सुमारास करंजविहीरे येथील पायटा (पानंद रस्ता) परिसरात ही घटना घडली. आरोपी कैलास याची नजर नात्यातील सिंधुबाई यांच्या अंगावरील दागिन्यांवर होती. त्याने त्यांच्याकडील २५,००० रुपये किमतीचा सोन्याचा चंद्रहार आणि मणी असा ऐवज जबरदस्तीने हिसकावून घेण्याचा प्रयत्न केला. यावेळी त्यांनी प्रतिकार केला असता, आरोपीने त्यांचा गळा आवळून खून केला.
​गुन्हा केल्यानंतर पुरावा नष्ट करण्याच्या उद्देशाने आरोपीने मृतदेह एका प्लास्टिकच्या गोणीत भरला आणि करंजविहीरे ते धामणे रस्त्यावरील भामा नदीच्या पात्रात फेकून दिला. अनेक दिवसांच्या तपासानंतर पोलिसांनी आरोपीला बेड्या ठोकल्या असून त्याच्यावर भारतीय न्याय संहिता कलम १०३(१), ३०९(६) आणि २३८ नुसार गुन्हा दाखल केला आहे.
​महाळुंगे एमआयडीसी पोलीस या प्रकरणाचा अधिक तपास करत आहेत.