पिंपरी-चिंचवड :
पुणे जिल्ह्यामध्ये गेल्या काही दिवसांपासून जाणवणारा उन्हाचा कडाका शनिवारी काहीसा ओसरल्याचे पाहायला मिळाले. संपूर्ण जिल्ह्याचा कमाल तापमानाचा पारा ४० अंश सेल्सिअसच्या खाली स्थिरावल्याने नागरिकांना वाढत्या उष्णतेपासून थोडा दिलासा मिळाला आहे. यामध्ये उद्योगनगरी पिंपरी-चिंचवडमधील तापमानातही घट नोंदवण्यात आली असून, शहराचा पारा ३७ ते ३८ अंशांच्या दरम्यान राहिला आहे.
हवामान विभागाने ९ मे २०२६ रोजी नोंदवलेल्या आकडेवारीनुसार, जिल्ह्यातील एकाही केंद्रावर तापमानाने ४० अंशांचा टप्पा ओलांडलेला नाही. पिंपरी-चिंचवड शहरात असलेल्या डुडुळगाव येथे ३८.० अंश सेल्सिअस तापमानाची नोंद झाली आहे. तर चिंचवड परिसराचे तापमान ३७.६ अंश सेल्सिअस इतके राहिले. शहराच्या जवळच असलेल्या तळेगावमध्येही पारा ३७.९ अंशांवर स्थिरावला होता.
जिल्ह्यात सर्वाधिक तापमानाची नोंद कोरेगाव पार्क (३९.४ अंश) आणि शिवाजीनगर (३८.६ अंश) येथे झाली असली तरी, औद्योगिक पट्ट्यातील तापमानात झालेली ही घट दिलासादायक मानली जात आहे. दुसरीकडे मावळ परिसरातील गिरीवण येथे ३७.२ अंश, तर हवेलीत ३६.२ अंश सेल्सिअस तापमान नोंदवले गेले.
जिल्ह्यातील शिरूरमध्ये सर्वात कमी म्हणजेच ३४.३ अंश सेल्सिअस तापमानाची नोंद झाली आहे. तापमानाचा पारा जरी ४० च्या खाली आला असला, तरी दुपारच्या वेळी हवेतील आर्द्रतेमुळे उकाडा कायम आहे. मात्र, तांत्रिकदृष्ट्या पारा घसरल्यामुळे शहरावरील ‘हीट वेव्ह’चे सावट सध्या तरी दूर झाल्याचे दिसत आहे.
