पिंपरी-चिंचवड(pimpri chinchwad) :मुलींच्या वसतीगृहाबाहेर पडलेला एक संशयास्पद बॉक्स… बॉम्बच्या संशयाने उडालेली एकच खळबळ… घटनास्थळी दाखल झालेली पोलिसांची फौज आणि बॉम्बशोधक पथक… तब्बल तासभर सगळ्यांचा रोखलेला श्वास… आणि शेवटी तो संशयास्पद बॉक्स उघडल्यावर जे बाहेर आलं, ते पाहून पोलिसांनी कपाळावर हात मारून घेतला आणि सुटकेचा श्वासही सोडला! त्या बॉक्समध्ये बॉम्ब नव्हे, तर चक्क एक मोठा, गोंडस ‘टेडी बियर’ शांतपणे झोपलेला होता! पिंपरीतील संत तुकाराम नगर येथील डॉ. डी. वाय. पाटील महाविद्यालयाच्या मुलींच्या वसतीगृहात शुक्रवारी रात्री हा हाय-व्होल्टेज ड्रामा घडला.
*रात्री सव्वा आठ वाजता वाजली ‘धोक्याची घंटा’*
नेहमीप्रमाणे शांत असलेल्या वसतीगृह परिसरात शुक्रवारी रात्री सव्वा आठच्या सुमारास अचानक धाकधूक वाढली. वसतीगृहाच्या आवारात एक बेवारस आणि बंद बॉक्स पडलेला काही जणांच्या नजरेस पडला. सुरक्षेच्या कारणास्तव तात्काळ संत तुकाराम नगर पोलिसांना फोन फिरवण्यात आला.
“वसतीगृहाबाहेर एक बेवारस बॉक्स पडला आहे आणि त्यात काहीतरी संशयास्पद असण्याची भीती आहे…”
हा फोन येताच पोलीस यंत्रणा तात्काळ ॲक्शन मोडमध्ये आली.
*अन् पोलिसांचा ताफा धावला…*
घटनेचे गांभीर्य ओळखून पोलीस निरीक्षक गोरख कुंभार यांच्या मार्गदर्शनाखाली पोलिसांनी पावले उचलली. मुख्यालयातून राखीव पोलिसांची तुकडी, गुन्हे शाखेची पथके आणि थेट बॉम्बशोधक व नाशक पथकाला (BDDS) पाचारण करण्यात आले. काही मिनिटांतच परिसर पोलीस छावणीत बदलला. खबरदारीचा उपाय म्हणून वसतीगृहाचा संपूर्ण परिसर रिकामा करण्यात आला. मुलींच्या चेहऱ्यावर भीती आणि उत्सुकता स्पष्ट दिसत होती.
*क्लायमॅक्स: सर्वांचे श्वास रोखले, पण…*
बॉम्बशोधक पथकाने अत्यंत काळजीपूर्वक, सर्व नियम पाळून त्या संशयित बॉक्सची तपासणी सुरू केली. संपूर्ण परिसरात सुई पडली तरी आवाज होईल अशी शांतता पसरली होती. पथकाने अत्यंत नाजूकपणे तो बॉक्स अलगद उघडला… सर्वांचे डोळे त्या बॉक्सवर खिळले होते. पण बॉक्स उघडताच समोर आलेलं दृश्य पाहून तिथे उपस्थित असलेल्या सर्वांच्याच चेहऱ्यावर हसू उमटले. त्या बॉक्समध्ये एक भला मोठा, मऊमऊ ‘टेडी बियर’ होता! पथकाने खबरदारी म्हणून त्या टेडी बियरचीही सखोल तपासणी केली, पण त्यात कोणतीही घातक वस्तू आढळली नाही.
*थोडक्यात काय तर… पोलिसांची झाली ‘मॉकड्रिल’!*
कोणीतरी गुपचूप गिफ्ट आणलेला किंवा विसरून गेलेला हा ‘टेडी बियर’ असल्याचा अंदाज पोलिसांनी वर्तवला आहे. या अफवेमुळे परिसरात काही काळ भीतीचे वातावरण नक्कीच निर्माण झाले होते, पण यानिमित्ताने पिंपरी-चिंचवड पोलिसांची तत्परता मात्र कौतुकास्पद ठरली. “संकट समयी पोलीस किती वेगाने धावून येतात, याची एक उत्तम आणि यशस्वी ‘मॉकड्रिल’च या निमित्ताने पार पडली,” अशी प्रतिक्रिया वरिष्ठ पोलीस अधिकाऱ्यांनी दिली.
सध्या पिंपरीत या ‘बॉम्ब ठरलेल्या टेडी बियर’चीच खुसखुशीत चर्चा रं
