पिंपरी, दि. १६ (pimpri chinchwad crime) – वर्चस्वाच्या कारणावरून तसेच जुन्या भांडणाचा राग मनात धरून एका तरुणावर लोखंडी रॉडने प्राणघातक हल्ला करण्यात आला. ही घटना वाकड येथील कावेरीनगर सबवेखाली शुक्रवारी (दि. १५ मे) रोजी दुपारी दोन वाजताच्या सुमारास घडली आहे.
या प्रकरणी पोलिसांनी दोघांविरुद्ध गुन्हा दाखल केला असून एकाला अटक केली आहे.
या प्रकरणी आरोपी किरण दिपक विटकर (वय २५) आणि चेतन दिपक विटकर (वय २७, दोघेही रा. १६ नंबर, पराग ज्वेलर्सच्या मागे, वाकड) यांच्यावर गुन्हा दाखल करण्यात आला आहे. त्यापैकी किरण विटकर याला पोलिसांनी अटक केली आहे. निकेश बंडु क्षिरसागर (वय २२, रा. पवार इस्टेट, थेरगाव) यांनी शुक्रवारी (दि. १५ मे) रोजी या संदर्भात वाकड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी आणि फिर्यादीच्या भावामध्ये वर्चस्वाच्या कारणावरून पूर्वी भांडण झाले होते. तसेच शुक्रवारी दुपारीही त्यांच्यात वाद झाला होता. याचाच राग धरून फिर्यादी शुक्रवारी दुपारी दोन वाजताच्या सुमारास घरी पायी जात असताना आरोपींनी सांगवी किवळे बीआरटी मार्गावरील कावेरीनगर बसवेच्या खाली त्यांना गाठले.
किरण विटकर याने फिर्यादीच्या अंगावर दुचाकी घालून त्यांना खाली पाडले, तर चेतन विटकर याने “तुला आज खलासच करतो” असे म्हणून लोखंडी रॉडने डोक्यात वार केले. यावेळी आरोपींनी रस्त्यावरील बॅरिकेटही फिर्यादीच्या अंगावर फेकून मारले आणि लाथाबुक्क्यांनी मारहाण करून गंभीर जखमी केले.
या घटनेचा पुढील तपास सहाय्यक पोलीस निरीक्षक गज्जेवार करीत आहेत.
