नागपूर : उपराजधानी नागपूरमधील महाल परिसरात भरदिवसा झालेल्या गोळीबाराच्या घटनेमुळे शहरात खळबळ उडाली आहे. कोठी रोड परिसरात तीन दुचाकींवरून आलेल्या सहा सराईत गुंडांनी भरचौकात दोन फैरी झाडून दहशत निर्माण केली. या प्रकारामुळे नागरिकांमध्ये भीतीचे वातावरण पसरले आहे.
पोलिसांनी दिलेल्या माहितीनुसार, संबंधित गुंडांनी वर्चस्वाच्या वादातून हा गोळीबार केल्याचा प्राथमिक अंदाज व्यक्त करण्यात येत आहे. अचानक झालेल्या गोळीबारामुळे परिसरातील नागरिकांनी जीव वाचवण्यासाठी धावाधाव केली. घटनेनंतर आरोपी घटनास्थळावरून पसार झाले.
या प्रकाराची माहिती मिळताच पोलिसांनी घटनास्थळी धाव घेत परिसरातील सीसीटीव्ही फुटेज तपासण्यास सुरुवात केली आहे. आरोपींचा शोध घेण्यासाठी विशेष पथके तयार करण्यात आली असून, पुढील तपास सुरू आहे.
