पिंपरी, दि. २० (प्रतिनिधी) – शेतीच्या बांधाच्या आणि वाटणीच्या कारणावरून दोन गटात लाकडी काठी आणि लोखंडी रॉडने भीषण हाणामारी झाली. ही घटना मावळ तालुक्यातील दारुंब्रे येथे मंगळवारी (दि. १९ मे) रोजी सकाळी साडेआठ ते नऊच्या सुमारास घडली आहे. या प्रकरणी दोन्ही बाजूंनी परस्परविरोधी गुन्हे दाखल करण्यात आले असून पोलिसांनी एका गटातील आरोपींना अटक केली आहे.
पहिल्या घटनेत फिर्यादी शरद बाजीराव वाघोले (वय ४५, रा. दारंब्रे, ता. मावळ, जि. पुणे) यांनी मंगळवारी (दि. १९ मे) रोजी आरोपी योगेश दगडु वाघोले (रा. दारुंने, ता. मावळ, जि. पुणे) याच्याविरुद्ध तक्रार दिली आहे. पोलिसांनी दिलेल्या माहितीनुसार, फिर्यादी शरद आणि त्यांची पत्नी शेतात बाजरीची कापणी करत असताना, आरोपीने ट्रॅक्टर चालकाला शेताचा बांध फोडण्यास सांगितले. यावर फिर्यादीने कोर्टात दावा सुरू असल्याचे सांगत बांध फोडण्यास विरोध केला. याचा राग येऊन आरोपीने शिवीगाळ, धक्काबुक्की करत लाकडी काठीने शरद यांच्या डाव्या हातावर जोरात वार केला, ज्यामध्ये त्यांच्या हाताचे हाड फॅक्चर झाले.
तर दुसऱ्या बाजूने योगेश दगडु वाघोले (वय ३८, रा. दारुंब्रे, ता. मावळ, जि. पुणे) यांनीही मंगळवारी (दि. १९ मे) रोजी फिर्याद दिली असून, शरद वाघोले, रेखा वाघोले, छाया वाघोले, नवनाथ वाघोले, यश वाघोले आणि स्वप्नील वाघोले (सर्व रा. दारुंब्रे, ता. मावळ, जि. पुणे) यांच्याविरुद्ध गुन्हा दाखल केला आहे. योगेश यांच्या तक्रारीनुसार, ते ट्रॅक्टरने शेतात काम करत असताना आरोपींनी शेतीच्या वाटणीवरून त्यांना लाथाबुक्क्यांनी मारहाण व शिवीगाळ केली. तसेच नवनाथ आणि स्वप्नील यांनी काठीने तर यश याने लोखंडी रॉडने मारून योगेश यांना जखमी केले. या प्रकरणातील आरोपींना अटक करण्यात आली आहे.
