पिंपरी, दि. २२ (प्रतिनिधी) – चिंचवडगावातील केशवनगर येथील ‘मोरया गोसावी क्रीडांगण’ पुन्हा एकदा वादाच्या केंद्रस्थानी आले आहे. तब्बल ४.३ कोटी रुपये खर्च करून विकसित करण्यात आलेल्या या क्रीडांगणावर क्रिकेट पिचसाठी सुरू असलेल्या खोदकामामुळे स्थानिक नागरिक, सोसायट्यामध्ये संतापाची लाट उसळली आहे.
गेल्या दोन दिव
सांपासून क्रीडांगणात दोन क्रिकेट पिच तयार करण्यासाठी खोदकाम सुरू करण्यात आले आहे. या मैदानाचा वापर लहान मुले, ज्येष्ठ नागरिक, महिला तसेच विविध मैदानी खेळ आणि सांस्कृतिक कार्यक्रमांसाठी केला जातो. त्यामुळे एका विशिष्ट खेळासाठी मैदानाची रचना बदलणे चुकीचे असल्याची भावना नागरिकांकडून व्यक्त होत आहे.
स्थानिक रहिवासी जीतेंद्र निखळ यांनी प्रशासनावर गंभीर आरोप केले आहेत. “कोट्यवधी रुपये खर्च करून सर्वांसाठी तयार केलेले क्रीडांगण काहींच्या व्यावसायिक फायद्यासाठी उकरले जात आहे. हा जनतेच्या पैशांचा अपव्यय आहे,” असे त्यांनी म्हटले आहे.
या कामाला फेडरेशन ऑफ दर्शन नगरी हौसिंग सोसायटी, गोयल गरिमा, मोरया राज पार्क, साई गणेश पार्क यांसह अनेक सोसायट्यांनी तीव्र विरोध दर्शवला आहे. आजी-माजी नगरसेवकांनीही या कामाला विरोध केला आहे. तसेच स्थानिक पदाधिकाऱ्यांनीही हे काम तातडीने थांबवण्याची मागणी केली आहे. दरम्यान, खोदकाम करून पीच तयार करणाऱ्या संबंधित अधिकाऱ्याची चौकशीची मागणी होत असून क्रीडांगण पूर्ववत करण्यासाठी नागरिक आक्रमक झाले आहेत.
—
कोट्यावधी रुपयांचा खर्च वाया जाण्याची भिती
पावसाचे पाणी मैदानात साचू नये म्हणून खाली पाइप टाकण्यात आले आहेत. या अत्याधुनिक कामासाठी साडेचार कोटी रुपयांचा खर्च केला आहे. आता क्रिकेट पीचसाठी मैदान खोदल्याने हा खर्च वाया जाण्याची भिती व्यक्त करण्यात येत आहे.
—
इतर खेळांवर होणार अन्याय
हे मैदान क्रिकेटसाठी योग्य नाही. खेळाडूंनी मारलेला चेंडू नागरिकांच्या घरात जाण्याची शक्यता आहे. तसेच क्रिकेट खेळाडूंची संख्या जादा असल्याने इतर खेळांवर अन्याय होण्याची शक्यता आहे. तसेच क्रीडांगणावरील धूळ थेट नागरिकांच्या घरात जात असल्याने आधीच नागरिकांचा त्यास विरोध आहे.
