पिंपरी, दि. २३ (प्रतिनिधी) – थेरगाव येथील जगतापनगर भागात मित्रांशी गप्पा मारत थांबलेल्या तरुणाला “आम्ही पिंपरी चिंचवडचे भाई आहोत” असे म्हणत तिघा जणांच्या टोळक्याने कोयत्याने हल्ला करून गंभीर जखमी केले. परिसरात कोयते हवेत फिरवून दहशत निर्माण करणाऱ्या दोन आरोपींना पोलिसांनी तात्काळ अटक केली आहे. ही घटना गुूरुवारी (दि. २१ मे) रोजी रात्री साडेअकरा वाजताच्या सुमारास घडली आहे.
गौरव उर्फ नन्या गौतम वाघमारे (वय २२) आणि रितेश क्षीरसागर (वय २१, दोघे रा. आनंदनगर झोपडपट्टी, चिंचवड, पुणे) अशी अटक करण्यात आलेल्या आरोपींची नावे आहे. तसेच त्यांच्या एका साथीदारावर (नाव, पत्ता माहिती नाही) याच्या विरोधातही गुन्हा दाखल केला आहे. या हल्ल्यात सौरभ विलास चौधरी (वय २४, रा. निता जगताप यांचे रूममध्ये, जगतापनगर, लेन नं. ४ व ५, थेरगाव) असे हल्ल्यात गंभीर जखमी झालेल्या तरुणाचे नाव असून त्यांनी शुक्रवारी (दि. २२) याबाबत काळेवाडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गुरुवारी (दि. २१ मे ) रोजी रात्री २३.३० वाजेच्या सुमारास फिर्यादी सौरभ चौधरी हे त्यांचे मित्र आदित्य धिवार, गौरव लोंढे, ओमकार कुचेकर आणि विनायक थोरात यांच्यासोबत समर्थ क्लिनिक समोर गप्पा मारत उभे होते. दरम्यान, एका ॲक्सेस दुचाकीवरून आरोपी गौरव वाघमारे, रितेश क्षीरसागर आणि त्यांचा एक साथीदार तिथे आले. आरोपी गौरवने फिर्यादीला शिवीगाळ करत कमरेचा लोखंडी कोयता काढून त्यांच्या डोक्यावर आणि उजव्या कोपरावर वार केला. पाठोपाठ आरोपी रितेश आणि त्याच्या अज्ञात साथीदारानेही कोयत्याने फिर्यादीच्या डाव्या हातावर वार करून गंभीर जखमी केले. फिर्यादीचे मित्र वाचवण्यासाठी मध्ये आले असता, “तुम्ही मध्ये आलात तर तुम्हालाही खल्लास करीन,” अशी धमकी देऊन आरोपींनी हवेत कोयते फिरवत परिसरात दहशत माजवली आणि पळ काढला. या प्रकरणाचा पुढील तपास काळेवाडी पोलीस ठाण्यातील सहाय्यक निरीक्षक नलावडे करीत आहेत.
