डिजिटल मालमत्ता कर व्यवस्थापनाचा घेतला आढावा; महसूलवाढ आणि पारदर्शकतेच्या मॉडेलची माहिती
पिंपरी-चिंचवड –
पिंपरी-चिंचवड महापालिकेची डिजिटल मालमत्ता कर प्रणाली आता इतर महापालिकांसाठीही अभ्यासाचा विषय ठरत आहे. महसूलवाढ, पारदर्शकता आणि तंत्रज्ञानाधारित कर व्यवस्थापनाच्या यशस्वी मॉडेलचा अभ्यास करण्यासाठी नवी मुंबई महापालिकेच्या शिष्टमंडळाने मंगळवारी पिंपरी-चिंचवड महापालिकेला भेट दिली. या वेळी महापालिकेच्या कर आकारणी आणि कर संकलन विभागाच्या कार्यपद्धतीचा सविस्तर आढावा घेण्यात आला.
महापालिकेचे उपायुक्त सचिन पवार यांनी शिष्टमंडळाला मालमत्ता कर विभागातील आधुनिक प्रणाली, डिजिटल सुविधा आणि महसूल व्यवस्थापनाबाबत सादरीकरण केले. जीआयएस आधारित मालमत्ता सर्वेक्षण, ऑनलाइन कर भरणा प्रणाली, थकबाकी वसुली मोहिमा आणि करदात्यांसाठी सुरू करण्यात आलेल्या नागरिकाभिमुख सुविधांची माहिती देण्यात आली.
“मालमत्ता कर व्यवस्थापन अधिक पारदर्शक आणि नागरिकाभिमुख करण्यासाठी तंत्रज्ञानाचा प्रभावी वापर केला जात आहे. जीआयएस सर्वेक्षण आणि डिजिटल सेवांमुळे महसूल वाढीसोबतच नागरिकांची गैरसोयही कमी झाली आहे,” असे उपायुक्त सचिन पवार यांनी सांगितले.
अभ्यास भेटीदरम्यान नवी मुंबई महापालिकेच्या अधिकाऱ्यांनी कर निर्धारण प्रक्रिया, पुनर्मूल्यांकन पद्धती, थकबाकी वसुलीसाठी वापरल्या जाणाऱ्या उपाययोजना आणि ऑनलाइन प्रणालीची सखोल माहिती घेतली. तसेच नागरिकांमध्ये कर भरण्याबाबत जागरूकता निर्माण करण्यासाठी राबविल्या जाणाऱ्या मोहिमांबाबतही चर्चा झाली.
दोन्ही महापालिकांमधील या प्रशासकीय देवाणघेवाणीमुळे स्थानिक स्वराज्य संस्थांमध्ये सर्वोत्तम पद्धतींचा प्रसार होण्यास मदत होणार आहे. भविष्यात अधिक सक्षम, वेगवान आणि तंत्रज्ञानाधारित नागरी प्रशासन उभारण्यासाठी अशा अभ्यासभेटी उपयुक्त ठरणार असल्याचे मत अधिकाऱ्यांनी व्यक्त केले.
