पिंपरी-चिंचवड :
भारतीय खेल प्राधिकरणाच्या वतीने उद्या, शुक्रवार (दि. ५ जून) रोजी सकाळी ठीक ५:०० वाजता निगडी वाहतूक विभागाच्या हद्दीत एका भव्य सायकल स्पर्धेचे (सायक्लोथॉन) आयोजन करण्यात आले आहे. या स्पर्धेत संपूर्ण शहरातून मोठ्या संख्येने सायकलस्वार सहभागी होणार आहेत.
या सायकल स्पर्धेत कोणताही अडथळा येऊ नये आणि शहरातील इतर वाहतूकही सुरक्षित व सुरळीत राहावी, यासाठी पिंपरी-चिंचवड वाहतूक शाखेचे पोलीस उपायुक्त विक्रांत देशमुख यांनी स्पर्धा मार्गावरील वाहतुकीत मोठे बदल केले आहेत. उद्या सकाळी ५:०० ते ९:०० वाजेपर्यंत (किंवा वाहतूक सुरळीत होईपर्यंत) अत्यावश्यक सेवेतील वाहने वगळून इतर सर्व प्रकारच्या वाहनांना खालील मार्गांवर प्रवेश बंदी असेल. नागरिकांनी पर्यायी मार्गांचा वापर करावा, असे आवाहन प्रशासनाने केले आहे.
महत्त्वाची सूचना : निगडी वाहतूक विभागाचे प्रभारी अधिकारी यांना स्पर्धा मार्गावर योग्य बॅरीगेटिंग लावून चोख बंदोबस्त ठेवण्याचे आदेश देण्यात आले आहेत. तरी उद्या सकाळी घराबाहेर पडण्यापूर्वी नागरिकांनी व वाहनचालकांनी या बदलांची नोंद घेऊन सहकार्य करावे, असे आवाहन वाहतूक शाखेतर्फे करण्यात आले आहे.
प्रमुख प्रवेश बंद मार्ग आणि पर्यायी मार्ग :
– बिजलीनगर चौक येथून संभाजी चौकाकडे जाण्यास मनाई. वाहने बिजलीनगरकडून डावीकडे वळून गुरुद्वारा चौकमार्गे जातील.
– कृष्णा पावभाजी व गुरुद्वारा चौक बोगद्याजवळून आकुर्डी रेल्वे स्टेशनकडे जाण्यास मनाई. आकुर्डी स्टेशनकडून कृष्णा पावभाजीकडे जाणारी वाहने गुरुद्वारा चौक बोगद्याकडून जातील.
– केरळाभवन आणि धर्मराज चौक येथून के सदन चौकाकडे जाण्यास मनाई. धर्मराज चौकाकडून डावीकडे व उजवीकडे वळून किंवा आकुर्डी चौकीकडे जाणाऱ्या रोडने जातील.
– पी.सी.सी. कॉलेज पंक्चर येथून के सदन चौकाकडे जाण्यास मनाई. पी.सी.सी. कॉलेजकडून यू-टर्न करून नवीन धर्मराज ब्रिजकडे जाता येईल.
– बिग इंडिया चौक येथून हुतात्मा चौकाकडे जाण्यास मनाई. बिग इंडिया चौकाकडून वाहतूक अप्पूघर कॉर्नर व भेळ चौक मार्गे वळवण्यात आली आहे.
– पाटीदार भवन पंक्चर येथून हुतात्मा चौकाकडे जाण्यास मनाई. गणेश तलावाकडून येणारी वाहतूक पाटीदार भवनकडून नवीन धर्मराज ब्रिजकडे जाईल.
– पोस्ट ऑफिस पंक्चर येथून हेगडेवार भवनकडे जाण्यास मनाई. पोस्ट ऑफिसकडून धन्वंतरी हॉस्पिटलकडून इच्छित स्थळी जाता येईल.
– रोटरी क्लब चौक येथून संभाजी चौककडे जाण्यास सर्व वाहनांना मनाई. भेळ चौकाकडून येणारी वाहतूक रोटरी क्लब मार्ग वापरेल.
– नॅचरल सुपर मार्केट गंगानगर रोडवरून म्हाळसाकांत चौकाकडे जाण्यास मनाई. नॅचरल सुपर मार्केट गंगानगर रोडकडून आकुर्डी रेल्वे स्टेशन किंवा दळवीनगर ब्रिजकडे जातील.
– अमरदीप स्वीट पंक्चर येथून म्हाळसाकांत चौकाकडे जाण्यास मनाई. अमरदीप स्वीट पंक्चरकडून उजवीकडे वळून इच्छित स्थळी जावे.
– आकुर्डी भाजी मंडई रोडवरून आंबेडकर चौकाकडे जाण्यास मनाई. सदर वाहने ओम शिवम डेअरीकडून बजाज अंडरपास मार्ग वापरतील.
– विठ्ठल मंदिर समोरील चौक येथून आंबेडकर चौकाकडे जाण्यास मनाई. वाहने विठ्ठल मंदिर कमानीकडून उर्सेला शाळेमार्गे जातील.
– खंडोबामाळ चौक आणि सावली हॉटेल येथून टिळक चौकाकडे जाण्यास मनाई. १) थरमॅक्स चौक मार्ग, २) दळवीनगर ब्रिज मार्ग किंवा ३) मल्हार हॉटेल मार्ग वापरावा.
– एसबीआय पंक्चर येथून भक्ती शक्ती ब्रिजकडे जाण्यास मनाई. सदर वाहने भक्ती शक्ती ओव्हर ब्रिजवरून देहूरोडच्या दिशेने जातील.
– भक्ती शक्ती सर्कल येथून अप्पुघरकडे आणि संत निरंकारी भवन येथून अंकुश चौक ग्रेड सेपरेटरमध्ये जाण्यास मनाई. भक्ती शक्ती सर्कलकडून डाव्या बाजूने टिळक चौक मार्ग वापरावा.
– अप्पुघर चौक येथून भक्ती शक्ती चौकाकडे जाण्यास मनाई. वाहने अप्पुघरकडून उजवीकडे वळून बिग इंडिया मार्ग वापरतील.
