सुपा : सुपा पोलीस स्टेशन हद्दीत घडलेल्या अपहरण प्रकरणाचा अवघ्या काही तासांत छडा लावत पोलिसांनी अपहरण झालेल्या तरुणाची सुखरूप सुटका केली. या प्रकरणी दोन आरोपींना अटक करण्यात आली असून न्यायालयाने त्यांना पोलीस कोठडी सुनावली आहे.
दि. ७ जून २०२६ रोजी ऋषिकेश विजय चांदगुडे (रा. दंडवाडी, ता. बारामती) याचे अपहरण झाल्याची माहिती सुपा पोलिसांना मिळाली. लाल रंगाच्या स्विफ्ट कारमधून ओंकार प्रकाश भोसले व तन्मय सुधीर साळुंखे यांनी ऋषिकेश यास जबरदस्तीने सासवडच्या दिशेने नेल्याची माहिती समोर आली.
घटनेची माहिती मिळताच सहाय्यक पोलीस निरीक्षक मनोजकुमार नवसरे यांच्या नेतृत्वाखाली विशेष पथक तयार करण्यात आले. जेजुरी, सासवड, उरुळीकांचन आणि यवत पोलीस ठाण्यांना नाकाबंदीच्या सूचना देण्यात आल्या. तांत्रिक विश्लेषणाद्वारे संशयितांचे लोकेशन दिवेघाट परिसरात असल्याचे निष्पन्न झाल्यानंतर पोलीस उपनिरीक्षक जिनेश कोळी व त्यांच्या पथकाने संशयित वाहनाचा पाठलाग सुरू केला.
सासवड पोलिसांच्या मदतीने झेंडेवाडी (ता. पुरंदर) येथे संशयित स्विफ्ट कार अडविण्यात आली. वाहनामध्ये ओंकार प्रकाश भोसले (वय २७), तन्मय सुधीर साळुंखे (वय २०) आणि दिव्या ओंकार भोसले (वय २२) आढळून आले. त्यांना ताब्यात घेतल्यानंतर पोलिसांनी अपहरण झालेल्या ऋषिकेश चांदगुडे याचा शोध घेऊन त्याची सुखरूप सुटका केली.
या प्रकरणी सुपा पोलीस ठाण्यात गुन्हा रजि. क्र. ११९/२०२६ अन्वये बीएनएसच्या विविध कलमानुसार गुन्हा दाखल करण्यात आला आहे. आरोपी ओंकार भोसले व तन्मय साळुंखे यांना अटक करण्यात आली असून न्यायालयाने त्यांना पोलीस कोठडी मंजूर केली आहे. पुढील तपास पोलीस उपनिरीक्षक जिनेश कोळी करीत आहेत.
ही कारवाई पोलीस अधीक्षक संदीपसिंह गिल, अप्पर पोलीस अधीक्षक गणेश बिराजदार व उपविभागीय पोलीस अधिकारी सुदर्शन राठोड यांच्या मार्गदर्शनाखाली सहाय्यक पोलीस निरीक्षक मनोजकुमार नवसरे यांच्या नेतृत्वाखालील पथकाने यशस्वीरीत्या पार पाडली.
