मित्राला झालेल्या मारहाणीबाबत आरोपींना समजावण्यासाठी गेलेल्या एका रिअल इस्टेट एजंटला टोळक्याने फायटरने आणि लाथाबुक्क्यांनी गंभीर मारहाण केली. ही घटना शुक्रवारी (५ जून) रात्री ९ वाजण्याच्या सुमारास चिकन चौक, यमुनानगर, निगडी येथे रस्त्यावर घडली.
या प्रकरणात प्रसाद प्रभाकर गव्हाणे (२२, निगडी प्राधिकरण) यांनी निगडी पोलीस ठाण्यात फिर्याद दिली आहे. त्यानुसार अमर बंडु उघडे (२९), अमर जितेन्द्र कसबे (२९, ओटास्कीम, निगडी) आणि इतर ८ ते १० अनोळखी व्यक्तींच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी व त्यांचा मित्र अमोल खुडे हे त्यांचे मित्र सावन राठोड याला आरोपींनी केलेल्या मारहाणीबाबत समजावण्यासाठी गेले होते. त्या वेळी आरोपी अमर कसबे याने फिर्यादीला हाताने मारहाण करून त्याच्या जवळील फायटरने फिर्यादीच्या डाव्या कानाच्या मागे मारून जखमी केले. तसेच इतर आरोपींनी फिर्यादीला लाथाबुक्क्यांनी मारहाण केली आणि रस्त्यावर मोठमोठ्याने ओरडून “आमच्यावर भरपूर गुन्हे दाखल आहेत, आमच्या नादी लागशील तर मारून टाकू” अशी धमकी देत परिसरात दहशत निर्माण केली. निगडी पोलीस तपास करत आहेत.
