बेकायदेशीरपणे आणि कुठलीही सुरक्षेची काळजी न घेता घरगुती वापराच्या सिलेंडर मधून इतर सिलेंडर मध्ये गॅस रिफील केल्याप्रकरणी चिखली आणि भोसरी येथे दोन कारवाया झाल्या. यामध्ये पोलिसांनी ३७ हजार ८०० रुपयांचा मुद्देमाल जप्त केला आहे.
पहिली कारवाई पाटीलनगर चिखली येथे करण्यात आली. मनोज नरेश मिश्रा (५५, चिखली. मूळ रा. बिहार) याने कोणतीही परवानगी न घेता तसेच सुरक्षेची काळजी न घेता घरगुती वापराच्या सिलेंडर मधून इतर सिलेंडर मध्ये गॅस रिफील केला. त्याच्या दुकानावर कारवाई करत पोलिसांनी २६ हजार रुपये किमतीचे चार घरगुती वापराचे सिलेंडर आणि १३ लहान सिलेंडर जप्त केले.
दुसरी कारवाई लोंढे आळी भोसरी येथील श्री महालक्ष्मी गॅस सर्व्हिस या दुकानात करण्यात आली. गणेश दादाराव कोनाळे (३८, चऱ्होली. मूळ रा. लातूर) याने देखील मोठ्या सिलेंडर मधून लहान सिलेंडर मध्ये बेकायदेशीरपणे गॅस रिफील केला. त्याने सुरक्षेबाबत कोणतीही खबरदारी घेतली नाही. पोलिसांनी त्याच्याकडून सिलेंडर आणि इतर साहित्य असा एकूण ११ हजार ८०० रुपयांचा मुद्देमाल जप्त केला आहे.
