सिंगापूर येथे राज्य उत्पादन शुल्क विभागाची मोठी कारवाई; १.२७ कोटींचा गोवा निर्मित मद्यसाठा जप्त

: राज्य उत्पादन शुल्क विभागाच्या सासवड पथकाने पुरंदर तालुक्यातील सिंगापूर गावच्या हद्दीत मोठी कारवाई करत गोवा राज्यात विक्रीसाठी असलेला आणि महाराष्ट्रात विक्रीस प्रतिबंधित असलेला तब्बल १ कोटी २७ लाख ५४ हजार ६०० रुपयांचा मद्यसाठा जप्त केला आहे. या कारवाईत एक आरोपी अटकेत असून एका सहाचाकी कंटेनरसह मोठ्या प्रमाणात विदेशी मद्य जप्त करण्यात आले आहे.
राज्य उत्पादन शुल्क, सासवड विभागाचे निरीक्षक एस. एस. बरगे यांना मिळालेल्या गोपनीय माहितीच्या आधारे ही कारवाई करण्यात आली. गोवा राज्य निर्मित मद्याची महाराष्ट्रात अवैधरीत्या मोठ्या प्रमाणावर तस्करी होत असल्याची माहिती विभागाला प्राप्त झाली होती. त्यानुसार सासवड विभागाच्या पथकाने विशेष मोहीम राबवून बेलसर-वाघापूर मार्गावर वाहनांची तपासणी सुरू केली.
तपासणीदरम्यान सिंगापूर गावच्या हद्दीत हॉटेल दोस्तीसमोर संशयित कंटेनर क्रमांक एन.एल.-०१ एन.-७६२३ थांबविण्यात आला. वाहन चालकाकडे चौकशी केली असता त्याने संशयास्पद उत्तरे दिल्याने वाहनाची सखोल तपासणी करण्यात आली. तपासणीमध्ये वाहनातून गोवा राज्य निर्मित रॉयल ब्ल्यू माल्ट व्हिस्की या ब्रँडच्या १८० मिली क्षमतेच्या तब्बल ६१ हजार ९२० सीलबंद बाटल्या (१,२९० बॉक्स) आढळून आल्या.
या मद्यसाठ्याची किंमत १ कोटी ११ लाख ४५ हजार ६०० रुपये इतकी असून, वाहतुकीसाठी वापरण्यात आलेला टाटा कंपनीचा एलपीटी-१६१५ मॉडेलचा कंटेनर, दोन मोबाईल फोन आणि इतर साहित्य असा एकूण १ कोटी २७ लाख ५४ हजार ६०० रुपयांचा मुद्देमाल जप्त करण्यात आला.
कारवाईदरम्यान वाहन चालकाकडे मद्य वाहतुकीसंदर्भातील कोणताही वैध परवाना, वाहतूक पास किंवा आवश्यक कागदपत्रे आढळून आली नाहीत. तसेच हा मद्यसाठा महाराष्ट्रात विक्री करण्याच्या उद्देशाने आणला जात असल्याचे प्राथमिक तपासात स्पष्ट झाले आहे.
याप्रकरणी कैलाशकुमार नानजी पटेल याला अटक करण्यात आली असून त्याच्याविरोधात महाराष्ट्र दारूबंदी कायदा १९४९ अंतर्गत कलम ६५ (अ)(ई), ८०, ८१, ८३, ९०, १०३ व १०८ अन्वये गुन्हा रजिस्टर क्रमांक १४८/२०२६, दिनांक २ जून २०२६ नुसार गुन्हा दाखल करण्यात आला आहे.
या धडक कारवाईत निरीक्षक एस. एस. बरगे, शिरूर विभागाचे निरीक्षक झेंडे, पी. एम. मोहिते, दुय्यम निरीक्षक पी. जे. मेहता, गिरीश कर्चे, सागर साबळे, मनोज होलम तसेच जवान दत्तात्रय पिलावरे, अंकुश कांबळे, मोहन गवळी, बाळू आढाव, तानाजी काळे, गणेश जाधव आणि सागर दुबळे यांनी सहभाग घेतला.
सदर गुन्ह्याचा पुढील तपास निरीक्षक एस. एस. बरगे, राज्य उत्पादन शुल्क, सासवड विभाग, हे करीत आहेत. या कारवाईमुळे पुरंदर तालुक्यातील अवैध मद्य तस्करीविरोधात राज्य उत्पादन शुल्क विभागाने कठोर भूमिका घेतल्याचे पुन्हा एकदा स्पष्ट झाले आहे.