वसई(vasai) : वसई परिसरात रेशन धान्याच्या बेकायदा विक्रीचा मोठा प्रकार उघडकीस आला असून पुरवठा विभागाने धडक कारवाई करत तब्बल १२० क्विंटल धान्य जप्त केले आहे. या कारवाईमुळे सार्वजनिक वितरण व्यवस्थेतील गैरप्रकार पुन्हा एकदा समोर आले आहेत.
मिळालेल्या माहितीनुसार, शिधापत्रिकाधारकांना शासनाकडून स्वस्त दरात दिले जाणारे तांदूळ आणि गहू काही व्यक्तींनी बाहेरच्या व्यापाऱ्यांना विकल्याचा प्रकार समोर आला आहे. झेंडा बाजार परिसरातील एका गोदामावर छापा टाकण्यात आल्यानंतर मोठ्या प्रमाणात साठा आढळून आला.
या कारवाईत ४५० किलो तांदूळ आणि ६५० किलो गहू असा एकूण ११०० किलो धान्यसाठा जप्त करण्यात आला आहे. पुढील तपासादरम्यान या प्रकरणात आणखी मोठा साठा असल्याचा संशय व्यक्त करण्यात येत आहे.
दरम्यान, संबंधित शिधापत्रिकाधारकांची चौकशी सुरू असून दोषींवर अत्यावश्यक वस्तू अधिनियमांतर्गत गुन्हा दाखल करण्याची प्रक्रिया सुरू आहे. तसेच अशा प्रकारे सरकारी धान्याचा गैरवापर करणाऱ्यांवर कठोर कारवाई करण्यात येईल, असा इशाराही पुरवठा विभागाने दिला आहे.
या घटनेनंतर वसई परिसरात खळबळ उडाली असून गरीब व गरजू नागरिकांसाठी असलेल्या योजनेचा गैरवापर होत असल्याबाबत नागरिकांमध्ये संताप व्यक्त केला जात आहे
