नवी दिल्ली(delhi) : भारताचे भविष्य घडविण्यात युवकांची भूमिका अत्यंत महत्त्वाची असून, त्यांच्या स्वप्नांना योग्य दिशा देणे आणि त्यांच्या कौशल्याला वाव मिळवून देणे ही सरकार, उद्योग क्षेत्र आणि समाजाची सामूहिक जबाबदारी असल्याचे प्रतिपादन केंद्रीय युवा व्यवहार व क्रीडा मंत्री डॉ. मनसुख मांडवीय यांनी केले.
युवा व्यवहार विभागाच्या वतीने आयोजित ‘इंडस्ट्री असोसिएशन कॉन्क्लेव्ह’ मध्ये डॉ. मांडवीय यांच्या उपस्थितीत विविध उद्योग क्षेत्रातील प्रतिनिधी, धोरणकर्ते आणि अधिकारी सहभागी झाले होते. या कार्यक्रमात युवा व्यवहार विभागाच्या सचिव डॉ. पल्लवी जैन गोविल यांच्यासह विविध उद्योग संघटनांचे प्रमुख उपस्थित होते.
या परिषदेत भारतातील युवकांच्या सर्वांगीण विकासासाठी खासगी क्षेत्राची भूमिका अधिक प्रभावी कशी करता येईल, यावर सखोल चर्चा करण्यात आली. युवकांना रोजगारक्षम बनविणे, कौशल्य विकासाला चालना देणे, नेतृत्वगुण विकसित करणे तसेच भविष्यातील आव्हानांसाठी सक्षम आणि आत्मनिर्भर नेतृत्व तयार करण्यावर विशेष भर देण्यात आला.
यावेळी वक्त्यांनी उद्योग क्षेत्र आणि शासन यांच्यात अधिक समन्वय निर्माण करून युवकांना प्रशिक्षण, इंटर्नशिप, नवउद्योजकता आणि रोजगाराच्या अधिक संधी उपलब्ध करून देण्याची गरज व्यक्त केली. ‘माय भारत’ उपक्रमाच्या माध्यमातून देशभरातील युवकांना राष्ट्रनिर्मितीच्या प्रक्रियेत सक्रिय सहभागी करून घेण्यावरही भर देण्यात आला.
‘विकसित भारत’ या संकल्पनेची पूर्तता करण्यासाठी युवकांना आधुनिक कौशल्ये, नाविन्यपूर्ण विचार आणि नेतृत्वाची संधी उपलब्ध करून देणे अत्यावश्यक असल्याचे मतही या परिषदेत व्यक्त करण्यात आले. युवकांच्या क्षमतेचा प्रभावी वापर करून भारताला जागतिक स्तरावर अधिक सक्षम आणि स्पर्धात्मक राष्ट्र बनविण्याच्या दिशेने सरकार आणि उद्योग क्षेत्राने एकत्रितपणे काम करण्याचा निर्धार यावेळी व्यक्त करण्यात आला.
या परिषदेमुळे युवक विकास, क्षमता वृद्धी आणि भविष्याभिमुख नेतृत्व घडविण्यासाठी सार्वजनिक-खासगी भागीदारीला अधिक बळ मिळणार असल्याचा विश्वास व्यक्त करण्यात आला.
