नवी दिल्ली | प्रतिनिधी
देशाच्या परकीय चलनसाठ्यात (Forex Reserves) मोठी वाढ नोंदविण्यात आली असून, ३ जुलै रोजी संपलेल्या आठवड्यात हा साठा ७.२६ अब्ज डॉलरने वाढून ६७४.१९ अब्ज डॉलरवर पोहोचला आहे. भारतीय रिझर्व्ह बँकेने (RBI) शुक्रवारी ही माहिती जाहीर केली.
याआधीच्या आठवड्यात देशाचा परकीय चलनसाठा ५.६५ अब्ज डॉलरने घटून ६६६.९३ अब्ज डॉलरवर आला होता. त्यानंतर झालेल्या या वाढीमुळे देशाच्या आर्थिक स्थितीला बळ मिळाल्याचे मानले जात आहे.
यावर्षी २७ फेब्रुवारी रोजी संपलेल्या आठवड्यात, पश्चिम आशियातील संघर्ष तीव्र होण्यापूर्वी भारताचा परकीय चलनसाठा ७२८.४९ अब्ज डॉलर या विक्रमी स्तरावर पोहोचला होता. त्यानंतर जागतिक घडामोडी आणि चलनबाजारातील चढ-उतारांमुळे साठ्यात काही प्रमाणात घट झाली होती.
परकीय चलनसाठ्यातील ही ताजी वाढ रुपयाची स्थिरता राखण्यास, आयात खर्च भागविण्यास आणि जागतिक आर्थिक अनिश्चिततेचा सामना करण्यासाठी देशाची क्षमता अधिक मजबूत करणारी असल्याचे तज्ज्ञांचे मत आहे.
