मुंबई : प्रतिनिधी
चेंबूरमधील डायमंड गार्डनजवळ शाळेच्या बसवर झाड कोसळून एका शाळकरी विद्यार्थ्याचा दुर्दैवी मृत्यू झालेल्या प्रकरणाचा चौकशी अहवाल मुंबई महापालिका प्रशासनाने जाहीर केला आहे. या दुर्घटनेत झाडांच्या देखभालीत निष्काळजीपणा झाल्याचा ठपका ठेवत संबंधित कंत्राटदारावर एकूण ७ लाख रुपयांचा दंड ठोठावण्यात आला आहे. मात्र, या प्रकरणात महापालिकेच्या उद्यान विभाग आणि रस्ते विभागाला चौकशी समितीने क्लीन चिट दिली आहे.
महापालिकेने नियुक्त केलेल्या चौकशी समितीने सादर केलेल्या अहवालानुसार, झाडांच्या देखभाल आणि छाटणीचे काम वेळेवर करण्यात आले होते. त्यामुळे दुर्घटनेसाठी उद्यान विभाग किंवा रस्ते विभाग जबाबदार नसल्याचे स्पष्ट करण्यात आले आहे. संबंधित विभागांनी आपल्या जबाबदाऱ्या नियमानुसार पार पाडल्याचे समितीने नमूद केले आहे.
दुसरीकडे, झाडांच्या देखभालीसाठी नियुक्त कंत्राटदाराकडून आवश्यक दक्षता न घेतल्याचे निरीक्षण नोंदवत त्याच्यावर आर्थिक दंडाची कारवाई करण्यात आली आहे. भविष्यात अशा घटना टाळण्यासाठी झाडांच्या तपासणी आणि देखभाल प्रक्रियेत अधिक काटेकोरपणा बाळगण्याच्या सूचनाही समितीने दिल्या आहेत.
या दुर्घटनेत एका निष्पाप विद्यार्थ्याचा जीव गेल्याने मुंबईभरातून तीव्र संताप व्यक्त करण्यात आला होता. अहवाल जाहीर झाल्यानंतर संबंधितांवर कारवाईची प्रक्रिया सुरू झाली असून, अशा दुर्घटना टाळण्यासाठी महापालिका सुरक्षा उपाययोजनांमध्ये अधिक सुधारणा करणार असल्याची माहिती प्रशासनाने दिली आहे.
