Pimpri-Chinchwad-बाराही महिने गारव्याची चव!; पिंपरी-चिंचवडकरांच्या जिभेवर आइस्क्रीमचे अधिराज्य आज जागतिक आइस्क्रीम दिन : पावसाळ्यातही वाढली विक्री; ‘नॅचरल’ आणि ‘शुगर-फ्री’ फ्लेवर्सना ग्राहकांची सर्वाधिक पसंती
पिंपरी-चिंचवड :
एकेकाळी केवळ उन्हाळ्यापुरते मर्यादित असलेले आइस्क्रीम आता पिंपरी-चिंचवडकरांच्या दैनंदिन जीवनाचा भाग बनले आहे. उन्हाळा, पावसाळा किंवा हिवाळा… कोणताही ऋतू असो, आइस्क्रीमप्रेमींची गर्दी मात्र कायम दिसत आहे. जागतिक आइस्क्रीम दिनानिमित्त शहरातील आइस्क्रीम पार्लर, कॅफे आणि विक्री केंद्रांमध्ये ग्राहकांची लगबग वाढली असून, बाराही महिने आइस्क्रीमच्या विक्रीला चांगला प्रतिसाद मिळत असल्याचे व्यावसायिक सांगत आहेत.
पिंपरी, चिंचवड, वाकड, हिंजवडी, निगडी आणि भोसरी परिसरात पारंपरिक मँगो, व्हॅनिला, चॉकलेट, बटरस्कॉच या फ्लेवर्सबरोबरच नॅचरल फ्रूट, ड्रायफ्रूट आणि प्रीमियम फ्लेवर्सची मागणी वाढली आहे. विशेषतः तरुणाई आणि नोकरदार वर्ग ‘शुगर-फ्री’ तसेच नैसर्गिक फळांपासून तयार केलेल्या आइस्क्रीमला पसंती देत आहे.
कच्च्या मालाच्या किमती वाढल्याने उत्पादन खर्चात वाढ झाली असली, तरी ग्राहक टिकवून ठेवण्यासाठी बहुतांश उत्पादकांनी दर नियंत्रणात ठेवले आहेत. त्यामुळे छोट्या कोनपासून मोठ्या फॅमिली पॅकपर्यंत सर्व पर्याय ग्राहकांना परवडणाऱ्या किमतीत उपलब्ध आहेत.
आहारतज्ज्ञांच्या मते, आइस्क्रीम खरेदी करताना दर्जेदार आणि विश्वासार्ह ब्रँडची उत्पादने निवडावीत. पॅकेटवरील माहिती तपासून ते ‘आइस्क्रीम’ आहे की ‘फ्रोजन डेझर्ट’, हे पाहणे आवश्यक आहे. कृत्रिम रंगांचा अतिरेक असलेली उत्पादने टाळून नैसर्गिक फ्लेवर्सना प्राधान्य द्यावे, असा सल्लाही तज्ज्ञांनी दिला आहे.
शहरातील बदलती जीवनशैली, वाढते उत्पन्न आणि खाद्यसंस्कृतीतील बदल यामुळे पिंपरी-चिंचवडमध्ये आइस्क्रीमचा बाजार वर्षभर तेजीत असून, जागतिक आइस्क्रीम दिनानिमित्त हा गोड गारवा अधिकच रंगताना दिसत आहे.
