Pimpri-Chinchwad-सायबर फसवणुकीसाठी बँक खात्यांचा गैरवापर उघड! पिंपरी-चिंचवडमध्ये तीन गुन्हे; लाखोंच्या संशयास्पद व्यवहारांचा पर्दाफाश
पिंपरी, दि. २० (प्रतिनिधी) – सायबर गुन्हेगारांकडून बँक खात्यांचा वापर करून देशभरातील नागरिकांची ऑनलाइन फसवणूक केली. याप्रकरणी पिंपरी, सांगवी आणि वाकड पोलीस ठाण्यांत तीन स्वतंत्र गुन्हे दाखल करण्यात आले आहेत.
पहिल्या प्रकरणात पिंपरी पोलीस ठाण्यात गुन्हा दाखल करण्यात आला आहे. पिंपरी गावातील शिवशक्ती अपार्टमेंट परिसरात सप्टेंबर ते डिसेंबर २०२५ या कालावधीत आरोपीने अक्षय हेमंत गायकवाड यांच्या नावाने द कॉसमॉस को-ऑपरेटिव्ह बँकेत खाते उघडले. त्यानंतर साथीदारांच्या मदतीने या खात्याद्वारे १९ हजार १०० रुपयांचे संशयास्पद व्यवहार करण्यात आले. या व्यवहारांच्या माध्यमातून देशातील दोन नागरिकांची ऑनलाइन फसवणूक झाल्याचे तपासात स्पष्ट झाले आहे.
दुसरे प्रकरण सांगवी पोलीस ठाण्याच्या हद्दीतील आहे. आरोपीने सुजल संताजी माने यांच्या नावाने आयडीएफसी बँकेत खाते उघडून मार्च ते जुलै २०२६ या कालावधीत तब्बल २ लाख ७५ हजार रुपयांचे व्यवहार केले. या खात्याचा वापर करून देशातील दोन नागरिकांची २ लाख ४९ हजार ८५४ रुपयांची फसवणूक करण्यात आल्याचे तपासात उघड झाले आहे. हे खाते पिंपळे सौदागर येथील पत्त्यावर नोंदणीकृत असल्याची माहिती पोलिसांनी दिली.
तिसऱ्या प्रकरणात वाकड पोलीस ठाण्यात माहिती तंत्रज्ञान कायद्यांतर्गत गुन्हा दाखल करण्यात आला आहे. पिंपळे निलख येथील विकास गजानन भुजबळ याने साथीदारांसह आयडीएफसी फर्स्ट बँकेत खाते उघडून संघटित गुन्हेगारीच्या उद्देशाने त्याचा वापर केल्याचा आरोप आहे. या खात्यावर तब्बल ८ लाख ८८ हजार ३८२ रुपयांचे आर्थिक व्यवहार झाल्याचे तपासात समोर आले आहे. या माध्यमातून देशातील चार नागरिकांची एकूण १ लाख २७ हजार रुपयांची फसवणूक झाल्याचे पोलिसांनी नमूद केले आहे.
या तिन्ही प्रकरणांमध्ये बँक खाती ही सायबर फसवणूक आणि संशयास्पद आर्थिक व्यवहारांसाठी वापरली गेल्याचे स्पष्ट झाले आहे. अशा गुन्ह्यांमध्ये सहभागी असलेल्या सर्व आरोपींचा शोध सुरू असून त्यांच्या इतर साथीदारांचाही तपास केला जात आहे. नागरिकांनी कोणत्याही व्यक्तीला कमिशन किंवा आर्थिक मोबदल्याच्या आमिषाने स्वतःचे बँक खाते, एटीएम कार्ड, चेकबुक किंवा ओटीपी देऊ नये, असे आवाहन पिंपरी-चिंचवड पोलीस आयुक्तालयाच्या गुन्हे शाखेने केले आहे.
