पिंपरी, दि. २७ (प्रतिनिधी) – पिंपरीच्या रिव्हररोड येथील कपडा मार्केटमधील ‘चॉईस व्हरायटी’ दुकानात घुसून कोयत्याचा धाक दाखवत हप्त्याची मागणी करून ३० हजार रुपयांची रोख रक्कम लुटली. ही घटना रविवारी (दि. २६ जुलै) रोजी दुपारी साडेचार वाजताच्या सुमारास घडली.
या प्रकरणी एक अल्पवयीन मुलाला बालकाला ताब्यात घेण्यात आले असून त्याचे दोन फरार साथीदार (अल्पवयीन मुले) यांच्यावर गुन्हा दाखल केला असून पोलीस त्यांचा शोध घेत आहेत. हर्ष प्रदिप पागराणी (वय २१, रा. सुखवाणी कॅसल, पिंपरी, पुणे) यांनी फिर्याद दिली आहे. पोलिसांनी दिलेल्या माहितीनुसार, तीन बालकांनी हातात कोयते घेऊन दुकानात प्रवेश केला. कोयत्याचा धाक दाखवून ३० हजार रुपयांची रोख रक्कम व इतर वस्तू जबरदस्तीने चोरल्या. विरोध केला असता फायटरने वार करून जखमी केले व दहशत माजवली. पिंपरी पोलीस पुढील तपास करत आहेत.
