अँटॉप हिल मॅटरनिटी हॉस्पिटलमध्ये प्रसूती महिलांना आहार न दिल्याचा आरोप; युवती सेनेच्या श्रद्धा वाघमारे यांचे महानगरपालिकेकडे निवेदन.
अँटॉप हिल येथील शशिकांत सावंत मॅटरनिटी हॉस्पिटलमध्ये प्रसूतीसाठी दाखल होणाऱ्या महिलांना गेल्या सुमारे तीन वर्षांपासून आवश्यक असा आहार दिला जात नसल्याचा गंभीर आरोप समोर आला आहे. या प्रकरणी युवती सेनेच्या प्रतिनिधी श्रद्धा वाघमारे यांनी मुंबई महानगरपालिकेच्या वैद्यकीय आरोग्य अधिकाऱ्यांकडे निवेदन सादर करून तात्काळ चौकशी व कारवाईची मागणी केली आहे.
निवेदनात म्हटले आहे की, प्रसूतीनंतर महिलांच्या आरोग्यासाठी पौष्टिक आहार अत्यंत आवश्यक असतो. मात्र संबंधित रुग्णालयात ही मूलभूत सुविधा उपलब्ध नसल्यामुळे महिलांच्या आरोग्यावर विपरीत परिणाम होत असून नवजात बालकांच्या आरोग्यालाही धोका निर्माण होण्याची शक्यता व्यक्त करण्यात आली आहे.
श्रद्धा वाघमारे यांनी प्रशासनाचे लक्ष वेधताना म्हटले की, सार्वजनिक आरोग्य व्यवस्थेत अशा प्रकारचा हलगर्जीपणा गंभीर असून यामुळे रुग्णसेवेच्या गुणवत्तेवर प्रश्नचिन्ह निर्माण होते. रुग्णालय प्रशासनाकडून आवश्यक सुविधांकडे दुर्लक्ष होत असल्याचा आरोपही त्यांनी केला आहे.
या प्रकरणाची तात्काळ चौकशी करण्यात यावी, दोषींवर कारवाई करावी, प्रसूती महिलांना नियमित व पौष्टिक आहार उपलब्ध करून द्यावा तसेच भविष्यात अशा प्रकारच्या निष्काळजीपणाला आळा घालण्यासाठी ठोस उपाययोजना करण्यात यावी, अशी मागणी निवेदनात करण्यात आली आहे.
दरम्यान, या आरोपांबाबत रुग्णालय प्रशासनाकडून अद्याप कोणतीही अधिकृत प्रतिक्रिया देण्यात आलेली नाही. मात्र या घटनेमुळे परिसरात चर्चा सुरू असून महानगरपालिका प्रशासन पुढे काय पाऊल उचलते याकडे सर्वांचे लक्ष लागले आहे.
