फुगेवाडी प्रकरणातील मृतांचा आकडा १३ वर; वायसीएममध्ये अद्याप चार जणांवर उपचार सुरू
पिंपरी, दि. ३ (प्रतिनिधी) – फुगेवाडी येथील विषारी दारू दुर्घटनेतील आणखी एका रुग्णाचा मंगळवारी (दि. ३) उपचारादरम्यान मृत्यू झाला. त्यामुळे पिंपरी-चिंचवड शहरातील या दुर्घटनेतील मृतांची संख्या आता १३ वर पोहोचली आहे. या घटनेमुळे परिसरात पुन्हा एकदा हळहळ व्यक्त केली जात असून उपचार घेत असलेल्या रुग्णांच्या प्रकृतीबाबतही चिंता व्यक्त केली जात आहे.
प्रफुल्ल अरिक स्वामी (वय २७) असे मृत्यू झालेल्या तरुणाचे नाव आहे. विषारी दारू प्राशन केल्यानंतर त्यांना उपचारासाठी पिंपरीतील वायसीएम रुग्णालयात दाखल करण्यात आले होते. अतिदक्षता विभागात त्यांच्यावर उपचार सुरू होते. मात्र मंगळवारी दुपारी उपचारादरम्यान त्यांची प्राणज्योत मालवली.
फुगेवाडी परिसरात घडलेल्या या दुर्घटनेनंतर अनेकांना विविध रुग्णालयांमध्ये दाखल करण्यात आले होते. काही रुग्णांची प्रकृती सुधारली असली तरी अद्याप काहीजण उपचार घेत आहेत. सध्या वायसीएम रुग्णालयात श्रीमंत कोळी (वय ६०), प्रकाश राठोड (वय ६५), जितू शेदातपुरी (वय ३१) आणि सोनू तायडे (वय ३०) यांच्यावर उपचार सुरू आहेत.
या दुर्घटनेनंतर प्रशासन आणि पोलीस यंत्रणा सतर्क झाली असून संबंधित प्रकरणाचा तपास सुरू आहे. दरम्यान, मागील काही दिवसांत नव्याने एकही रुग्ण दाखल झालेला नसल्याची माहिती सूत्रांनी दिली. त्यामुळे विषारी दारू प्राशनामुळे बाधित झालेल्यांची संख्या स्थिर असली तरी मृतांचा वाढता आकडा चिंतेचा विषय ठरत आहे.
फुगेवाडीतील विषारी दारू दुर्घटनेने अनेक कुटुंबांवर दुःखाचा डोंगर कोसळला आहे. या प्रकरणात मृतांचा आकडा वाढत असल्याने नागरिकांमध्येही संतापाची भावना व्यक्त होत आहे. उपचार सुरू असलेल्या रुग्णांची प्रकृती लवकर सुधारावी, अशी अपेक्षा त्यांच्या नातेवाईकांकडून व्यक्त होत आहे.
….
एका रुग्णाला मिळाला डिस्चार्ज
विषारी दारू प्यायल्यामुळे त्रास होऊ लागल्याने असलम खान यांना ससून रुग्णालयात दाखल करण्यात आले होते. तिथे त्यांच्यावर यशस्वी उपचार केल्यावर मंगळवारी (दि. २ मे) रोजी डिस्चार्ज देण्यात आला आहे. ते त्यांच्या मूळ गावी भुसावळ येथे गेले आहेत, अशी माहिती दापोडी पोलीस ठाण्याचे वरिष्ठ निरीक्षक गोरख कुंभार यांनी दिली आहे.
