सहा तासांत घरफोडीचा छडा; अल्पवयीन मुलासह तिघे ताब्यात काळेवाडी पोलिसांची कारवाई; एक लाख आठ हजारांचा मुद्देमाल जप्त
पिंपरी : काळेवाडी पोलिस ठाण्याच्या हद्दीत मध्यरात्री बंद घरांचे कुलूप तोडून घरफोडी करणाऱ्या सराईत चोरट्यांचा काळेवाडी पोलिसांनी अवघ्या सहा तासांत छडा लावला. या कारवाईत दोन सराईत गुन्हेगारांसह एका विधीसंघर्षित बालकाला ताब्यात घेण्यात आले असून, त्यांच्याकडून चोरीतील एक लाख आठ हजार ९७० रुपयांचा मुद्देमाल तसेच एक गावठी पिस्तूल आणि दोन जिवंत काडतुसे जप्त करण्यात आली आहेत.
कैलास अशोक खलसे (वय ४०, रा. भारतनगर, पिंपरी), शुभम शांताराम दुबे (वय २७, रा. थेरगाव), अशी अटक केलेल्या दोघांची नावे आहेत. त्यांच्यासह एका विधीसंघर्षित बालकाला पोलिसांनी ताब्यात घेतले. काळेवाडी पोलिस ठाण्याचे वरिष्ठ पोलिस निरीक्षक राजेंद्र बहिरट यांनी दिलेल्या माहितीनुसार, काळेवाडी पोलिस ठाण्याच्या हद्दीत रविवारी (दि. २६ जुलै) रात्री दीड ते पहाटे तीन वाजण्याच्या दरम्यान अज्ञात चोरट्यांनी बंद घरांचे कडी-कोयंडे तोडून घरात प्रवेश केला. घरातील मौल्यवान वस्तू आणि इतर साहित्य चोरून नेले. याप्रकरणी काळेवाडी पोलिस ठाण्यात गुन्हा दाखल करण्यात आला. काळेवाडी पोलिसांच्या तपास पथकाने गुन्ह्याचा तपास करताना पोलिसांनी सीसीटीव्ही फुटेज, तांत्रिक विश्लेषण आणि गुप्त खबऱ्यांच्या मदतीने संशयितांचा माग काढला. त्यानुसार कैलास खलसे आणि शुभम दुबे आणि एका विधीसंघर्षित बालकाचा गुन्ह्यात सहभाग निष्पन्न झाला. तिघांना ताब्यात घेतल्यानंतर चौकशीत त्यांनी गुन्ह्याची कबुली दिली. त्यांच्याकडून चोरीतील संपूर्ण मुद्देमाल जप्त करण्यात आला.
पोलिस उपायुक्त प्रदीप जाधव, सहायक आयुक्त सुनील कुराडे यांच्या मार्गदर्शनाखाली वरिष्ठ निरीक्षक राजेंद्र बहिरट, निरीक्षक (गुन्हे) सुरेंद्र धुमाळे, तपास पथकातील सहायक निरीक्षक वैभव गुरव, पोलिस अंमलदार प्रमोद कदम, अतिक शेख, भारत पारधी, अशोक जायभाये, रमेश ब्राम्हण, अजय फल्ले, भास्कर भारती, गणेश जाधव, मंगेश लोखंडे यांच्या पथकाने ही कामगिरी केली.
एक पिस्तूल, दोन काडतुसे जप्त
तपासादरम्यान संशयितांकडून एक गावठी पिस्तूल आणि दोन जिवंत काडतुसेही हस्तगत करण्यात आली. दोन्ही अटक संशयितांविरुद्ध यापूर्वीही मालमत्तेविरुद्धचे गुन्हे दाखल असल्याची माहिती पोलिसांनी दिली.
