Mumbai-महाराष्ट्रातील गुंतवणुकीच्या संधींबाबत मुख्यमंत्री फडणवीस यांची ॲमेझॉनचे CEO अँडी जेसी यांच्यासोबत चर्चा
मुंबई(mumbai) : मुख्यमंत्री देवेंद्र फडणवीस यांनी मुंबईतील ताज पॅलेस हॉटेल येथे ॲमेझॉनचे मुख्य कार्यकारी अधिकारी (CEO) अँडी जेसी यांची भेट घेऊन महाराष्ट्रातील विविध क्षेत्रांतील गुंतवणुकीच्या संधींबाबत सविस्तर चर्चा केली.
यावेळी मुख्यमंत्री फडणवीस यांनी महाराष्ट्र हे देशातील डेटा सेंटर क्षेत्राची राजधानी बनत असल्याचे सांगत, डेटा सेंटरच्या विस्तार आणि विकासासाठी राज्यात अत्याधुनिक परिसंस्था उभारण्यात येत असल्याचे नमूद केले. तसेच आरोग्य, तंत्रज्ञानविषयक पायाभूत सुविधा आणि कृत्रिम बुद्धिमत्तेवर आधारित कौशल्य विकास या क्षेत्रांत मोठ्या प्रमाणात गुंतवणुकीच्या संधी उपलब्ध असल्याने ॲमेझॉनने महाराष्ट्रात अधिक गुंतवणूक करावी, असे आवाहन त्यांनी केले.
मुख्यमंत्री फडणवीस यांनी नवी मुंबई येथे विकसित होत असलेल्या मेडिसिटी प्रकल्पाची माहिती देताना सांगितले की, या ठिकाणी आरोग्यसेवेची संपूर्ण साखळी उभारली जात आहे. मेडिसिटीच्या माध्यमातून ॲमेझॉनला आरोग्य क्षेत्रातही गुंतवणुकीची मोठी संधी उपलब्ध होऊ शकते, असे त्यांनी नमूद केले.
या बैठकीस मुख्यमंत्री यांचे अपर मुख्य सचिव लोकेश चंद्र, गुंतवणूक सल्लागार कौस्तुभ धवसे, उद्योग विभागाचे प्रधान सचिव पी. अन्बळगन, विकास आयुक्त (उद्योग) कादंबरी बलकवडे यांच्यासह ॲमेझॉन एडब्ल्यूएसचे कंट्री हेड संदीप दत्ता, ॲमेझॉन ग्लोबलचे कंट्री हेड समीर कुमार, एडब्ल्यूएसचे पब्लिक पॉलिसी संचालक विक्रम श्रीधरन आणि ग्लोबल ॲमेझॉनचे उपाध्यक्ष धर्मेश मेहता उपस्थित होते.
राज्यातील डिजिटल, आरोग्य आणि तंत्रज्ञान क्षेत्रातील विकासाला चालना देण्यासाठी जागतिक कंपन्यांच्या गुंतवणुकीला प्रोत्साहन देण्यावर या बैठकीत भर देण्यात आला.
