एका झटक्यात सीएनजीच्या दरात अडीच रुपयांची वाढ; रिक्षा, ट्रॅव्हल्स आणि मालवाहतूक क्षेत्राचे गणित बिघडले
सीएनजी दरवाढीचा पिंपरी-चिंचवडकरांना जबर फटका!
पिंपरी-चिंचवड :
आधीच महागाईने हैराण झालेल्या पिंपरी-चिंचवडकरांना आता सीएनजी दरवाढीचा आणखी एक जोरदार आर्थिक फटका बसला आहे. महाराष्ट्र नॅचरल गॅस लिमिटेडकडून (एमएनजीएल) सीएनजीच्या दरात थेट अडीच रुपयांची वाढ करण्यात आली आहे. या निर्णयामुळे खासगी वाहनधारकांसह रिक्षाचालक आणि व्यावसायिक वाहनचालकांमध्ये तीव्र नाराजी पसरली आहे.
नवीन दरानुसार पिंपरी-चिंचवड आणि पुणे शहरात सीएनजीचा दर आता प्रतिकिलो ९४ रुपये ७५ पैशांवर पोहोचला आहे. यापूर्वी हा दर ९२ रुपये २५ पैसे होता. अचानक झालेल्या वाढीमुळे वाहनधारकांचे महिन्याचे इंधन बजेट कोलमडण्याची शक्यता आहे.
पेट्रोल-डिझेलच्या तुलनेत कमी खर्चिक पर्याय म्हणून नागरिकांनी मोठ्या प्रमाणात सीएनजी वाहनांकडे मोर्चा वळवला होता. शहरात अनेक वाहनधारकांनी लाखो रुपये खर्च करून सीएनजी किट बसवले. मात्र, आता सीएनजीचे दरही वेगाने वाढू लागल्याने वाहनधारकांमध्ये संताप व्यक्त केला जात आहे.
या दरवाढीचा सर्वाधिक फटका रिक्षाचालक आणि मालवाहतूक व्यवसायाला बसणार आहे. दिवसभर शहरभर धावणाऱ्या रिक्षांचे दररोजचे इंधन खर्च मोठ्या प्रमाणात वाढणार आहेत. प्रवासी वाहतूक आणि ट्रान्सपोर्ट क्षेत्राचे आर्थिक गणितही कोलमडण्याची भीती व्यक्त होत आहे.
दरम्यान, सीएनजी महागल्याने वाहतूक खर्च वाढण्याची शक्यता निर्माण झाली आहे. त्याचा परिणाम भाजीपाला, दूध, किराणा आणि इतर जीवनावश्यक वस्तूंच्या दरांवर होऊ शकतो. त्यामुळे महागाईचा भडका आणखी वाढण्याची चिन्हे दिसत आहेत.
“एकीकडे कमाई कमी आणि दुसरीकडे इंधन दरवाढ सुरूच आहे. वाहन चालवायचे तरी कसे?” असा सवाल रिक्षाचालकांकडून उपस्थित केला जात आहे. वाढत्या इंधन दरांमुळे सर्वसामान्य नागरिकांचे आर्थिक गणित पूर्णपणे विस्कळीत होत असल्याची भावना शहरातून व्यक्त होत आहे.
