पिंपरी, दि. 30 (प्रतिनिधी) – फुगेवाडी विषारी दारू प्रकरणातील मृतांचा आकडा आणखी वाढला आहे. या प्रकरणात उपचार घेत असलेल्या राजेंद्र टप्पो (वय ३६, रा. फुगेवाडी) यांचा शनिवारी मृत्यू झाला. त्यामुळे या घटनेतील मृतांची संख्या वाढल्याने परिसरात पुन्हा एकदा हळहळ व्यक्त होत आहे.
राजेंद्र टप्पो यांना प्रकृती खालावल्याने शुक्रवारी जिल्हा रुग्णालयातील अतिदक्षता विभागात दाखल करण्यात आले होते. वैद्यकीय पथकाकडून त्यांच्यावर उपचार सुरू होते. मात्र उपचारादरम्यान त्यांची प्रकृती अधिक गंभीर बनली आणि शनिवारी त्यांचा मृत्यू झाला.
फुगेवाडी आणि दापोडी परिसरातील विषारी दारू प्रकरणामुळे आधीच अनेक कुटुंबांवर दुःखाचा डोंगर कोसळला आहे. त्यात आणखी एका मृत्यूची भर पडल्याने नागरिकांमध्ये चिंता व्यक्त होत आहे. या प्रकरणाचा तपास विविध यंत्रणांकडून सुरू असून मृत्यूमागील कारणांचा सखोल शोध घेतला जात आहे.
दरम्यान, या प्रकरणातील काही रुग्णांवर अद्याप विविध रुग्णालयांत उपचार सुरू असल्याची माहिती मिळत आहे. त्यामुळे मृतांचा आकडा आणखी वाढू नये, यासाठी आरोग्य यंत्रणा दक्ष झाली आहे.
फुगेवाडी विषारी दारू प्रकरणातील मृतांचा आकडा वाढला उपचारादरम्यान आणखी एकाचा मृत्यू; जिल्हा रुग्णालयात सुरू होती उपचारांची शर्थ
