कराकास : व्हेनेझुएलामध्ये बुधवारी झालेल्या तीव्र भूकंपानंतरची परिस्थिती अजूनही गंभीर असून, मृतांचा आकडा १,४३० वर पोहोचला आहे. तर ३,२३८ जण जखमी झाले असून ३,१४२ कुटुंबे या आपत्तीमुळे प्रभावित झाली आहेत. ही माहिती व्हेनेझुएलाच्या राष्ट्रीय सभेचे अध्यक्ष जॉर्ज रॉड्रिग्ज यांनी शनिवारी दिली.
रिख्टर स्केलवर ७.२ आणि ७.५ तीव्रतेचे दोन शक्तिशाली भूकंप झाल्यानंतर देशात आतापर्यंत ४३० सौम्य ते मध्यम तीव्रतेचे आफ्टरशॉक्स (पश्चात धक्के) नोंदवले गेले आहेत. त्यामुळे अनेक भागांत नागरिकांमध्ये भीतीचे वातावरण कायम असून, बचाव आणि मदतकार्य युद्धपातळीवर सुरू आहे.
दरम्यान, व्हेनेझुएलातील चीनच्या दूतावासाने दिलेल्या माहितीनुसार, या भीषण आपत्तीत आठ चिनी नागरिकांचा मृत्यू झाल्याची अधिकृत पुष्टी करण्यात आली आहे.
भूकंपामुळे अनेक इमारती, रस्ते आणि सार्वजनिक पायाभूत सुविधांचे मोठ्या प्रमाणात नुकसान झाले असून, प्रभावित भागात अन्न, पाणी आणि वैद्यकीय मदत पोहोचविण्याचे प्रयत्न सुरू आहेत.
