राज्यव्यापी बंदची हाक; रुग्णांची गैरसोय टाळण्यासाठी प्रशासन सतर्क, आपत्कालीन मदतीसाठी हेल्पलाईन जाहीर
पुणे : अखिल भारतीय औषधी विक्रेता संघटनेने २० मे २०२६ रोजी राज्यव्यापी बंदची घोषणा केल्याने पुणे आणि पिंपरी-चिंचवडमधील औषध दुकाने बंद राहण्याची शक्यता आहे. या पार्श्वभूमीवर अन्न व औषध प्रशासनाने नागरिकांना आवश्यक औषधांचा आगाऊ साठा करून ठेवण्याचे आवाहन केले आहे.
विशेषतः मधुमेह, रक्तदाब, हृदयविकार आणि इतर नियमित औषधे घेणाऱ्या रुग्णांनी खबरदारी घ्यावी, असे प्रशासनाने स्पष्ट केले आहे. बंदमुळे नागरिकांमध्ये घबराट निर्माण होऊ नये, यासाठी प्रशासनाने परिस्थितीवर लक्ष ठेवले आहे.
पुणे विभागाचे सह आयुक्त (औषधे) गि. दि. हुकरे यांनी प्रसिद्धीपत्रकाद्वारे नागरिकांना अफवांवर विश्वास न ठेवण्याचे आवाहन केले आहे. “रुग्णांना वेळेवर औषधे मिळणे अत्यावश्यक आहे. कृत्रिम तुटवडा निर्माण करणाऱ्यांवर कारवाई केली जाईल,” असा इशाराही त्यांनी दिला.
दरम्यान, बंद असला तरी काही अत्यावश्यक सेवा सुरू राहणार आहेत. शासकीय रुग्णालयांतील औषध भांडार, रुग्णालय संलग्न मेडिकल स्टोअर्स, तसेच apollopharmacy.in�, medplusmart.com� आणि wellnessforever.com� यांसारखी साखळी औषध दुकाने सुरू राहण्याची शक्यता आहे. जनरिक औषध दुकानेही सेवा देणार असल्याचे प्रशासनाने सांगितले.
औषधांची अनुपलब्धता भासल्यास किंवा तातडीच्या मदतीसाठी प्रशासनाने हेल्पलाईन क्रमांक जाहीर केले आहेत. नागरिकांनी रु. वि. पोंगळे (९७३००८५५८८), स. कृ. तितर-दातीर (८६०५०००४६०), आ. आ. रासकर (८६५२५८३५२५) आणि सं. मा. राठोड (९९२३३०४६५०) यांच्याशी संपर्क साधावा.
दरम्यान, औषध विक्रेत्यांनी बंदमध्ये सहभागी न होता रुग्णसेवा सुरू ठेवावी, असे आवाहनही प्रशासनाने केले आहे. “औषधे उपलब्ध करून देणे ही सामाजिक जबाबदारी आहे,” असे प्रशासनाने स्पष्ट केले आहे.
