pimpri chinchwad-चिंचवडमधील ‘एम्प्रोस इंटरनॅशनल स्कूल’मध्ये भीषण आग; एसी फुटल्याने वर्गखोली धुराने भरली
(pimpri chinchwad)-चिंचवडमधील ‘एम्प्रोस इंटरनॅशनल स्कूल’मध्ये भीषण आग; एसी फुटल्याने वर्गखोली धुराने भरली
एमआयडीसीतील ‘एम्प्रोस इंटरनॅशनल स्कूल’मधील घटना; अग्निशमन दलाच्या तात्काळ कारवाईमुळे मोठा अनर्थ टळला
पिंपरी-चिंचवड :
चिंचवड एमआयडीसी परिसरातील ‘एम्प्रोस इंटरनॅशनल स्कूल’मध्ये बुधवारी दुपारी अचानक आग लागल्याने परिसरात एकच खळबळ उडाली. शाळेतील एसी फुटल्याने ही आग लागल्याची प्राथमिक माहिती समोर आली आहे. काही क्षणांतच वर्गखोलीतून धुराचे मोठे लोट बाहेर येऊ लागल्याने परिसरात भीतीचे वातावरण निर्माण झाले होते. मात्र, अग्निशमन दलाच्या तात्काळ कारवाईमुळे तसेच शाळेला उन्हाळ्याची सुट्टी असल्यानेमोठा अनर्थ टळला.
ही घटना गुरुवारी दुपारी ३ वाजून १८ मिनिटांच्या सुमारास घडली. एमआयडीसी, ब्लॉक-सी येथील ‘एम्प्रोस इंटरनॅशनल स्कूल’च्या पहिल्या मजल्यावरील एका वर्गखोलीमध्ये एसीमध्ये अचानक स्फोट झाला. त्यानंतर काही क्षणांतच आग भडकली. वर्गामध्ये मोठ्या प्रमाणात फर्निचर असल्याने आगीने झपाट्याने रौद्र रूप धारण केले.
आगीमुळे पहिल्या आणि दुसऱ्या मजल्यावर मोठ्या प्रमाणात काळा धूर पसरला. शाळा परिसर धुराने भरून गेल्याने काही काळ गोंधळाचे वातावरण निर्माण झाले होते. घटनेची माहिती मिळताच पिंपरी-चिंचवड अग्निशमन दलाच्या चार गाड्या तातडीने घटनास्थळी दाखल झाल्या.
अग्निशमन दलाच्या जवानांनी वेगाने परिस्थिती नियंत्रणात घेत पाण्याचा मारा सुरू केला. काही वेळातच आगीवर नियंत्रण मिळवण्यात यश आले. त्यानंतर जवानांनी पहिल्या आणि दुसऱ्या मजल्यावरील वर्गखोल्यांचे दरवाजे व खिडक्या उघडून आतमध्ये साचलेला धूर बाहेर काढला.
सुदैवाने घटना घडली त्यावेळी शाळा बंद होती. त्यामुळे वर्गामध्ये कोणताही विद्यार्थी किंवा कर्मचारी उपस्थित नव्हता. यामुळे मोठी जीवितहानी टळली. मात्र, वर्गखोलीतील फर्निचर आणि विद्युत साहित्याचे नुकसान झाल्याची माहिती मिळत आहे.
दरम्यान, या घटनेनंतर शाळांमधील विद्युत सुरक्षेचा प्रश्न पुन्हा ऐरणीवर आला आहे. एसी आणि विद्युत यंत्रणांची नियमित तपासणी करण्याची गरज व्यक्त केली जात आहे. अग्निशमन दलाच्या सतर्कतेमुळे संभाव्य मोठी दुर्घटना टळल्याने नागरिकांकडून जवानांचे कौतुक करण्यात येत आहे.
