पिंपरी, दि. ३ (pimpri chinchwad) – इमारतीचे बांधकाम सुरू असताना चौथ्या मजल्याचा स्लॅब कोसळून एका मजुराचा दुर्दैवी मृत्यू झाला. सुरक्षा साधनांचा अभाव असल्यामुळे ही दुर्घटना घडल्याचे समोर आले आहे. ही घटना गुरुवारी (दि. २ एप्रिल) रोजी दुपारी एक वाजताच्या सुमारास चाकण जवळील मेदनकरवाडी येथे घडली.
नुनुचंद नेहाल महतो (वय ४६) असे मृत्यूमुखी पडलेल्या कामगाराचे नाव आहे. याप्रकरणी कंत्राटदार अरविंद शारवाले (रा. बालाजीनगर, मेदनकरवाडी) याला पोलिसांनी अटक केली आहे.
रितलाल शाबुन महतो (वय ६०, रा. आगरकरवाडी, पुणे) यांनी गुरुवारी (दि. २ एप्रिल) रोजी चाकण पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गुरुवारी दुपारी एक वाजताच्या सुमारास ‘वैदवस्ती’ येथील एका प्लॉटवर इमारतीचे काम सुरू होते. नुनुचंद नेहाल महतो हे चौथ्या मजल्यावर काम करत असताना अचानक स्लॅब तुटला आणि ते खाली कोसळले. उंचावर काम करताना कंत्राटदाराने सेफ्टी बेल्ट, हेल्मेट किंवा जाळी यांसारखी कोणतीही सुरक्षा साधने पुरवली नव्हती. या गंभीर दुर्लक्षामुळे ननचंद यांचा जागीच मृत्यू झाला. पुढील तपास चाकण पोलीस ठाण्याचे सपोनि धायगुडे करीत आहेत.
