जून अखेरही पावसाचा ठावठिकाणा नाही; बाजारात मात्र पावसाळी साहित्याच्या विक्रीला उधाण, पाणीटंचाईचीही चिंता वाढली
पिंपरी-चिंचवड :
मान्सूनने पाठ फिरवल्याने जून महिना जवळपास कोरडाच गेला आहे. दमदार पावसाची प्रतीक्षा अजूनही कायम आहे. मात्र, पावसाने दडी मारली असली तरी पिंपरी-चिंचवडकरांनी पावसाळ्याची तयारी पूर्ण केली आहे. शहरातील बाजारपेठांमध्ये छत्र्या, रेनकोट आणि पावसाळी साहित्याच्या खरेदीला चांगलाच वेग आला आहे. पाऊस कधीही बरसेल, या आशेवर नागरिक खरेदी करत असल्याचे चित्र पाहायला मिळत आहे.
पिंपरी, चिंचवड, आकुर्डी, निगडी, थेरगाव, वाकड आणि भोसरीतील बाजारपेठांमध्ये ग्राहकांची गर्दी वाढली आहे. विविध रंगांच्या छत्र्या, आकर्षक डिझाईनचे रेनकोट आणि वॉटरप्रूफ साहित्याची दुकाने सजली आहेत. शाळकरी मुलांसाठी कार्टून प्रिंटचे रेनकोट, महिलांसाठी स्टायलिश छत्र्या आणि दुचाकीस्वारांसाठी विशेष रेनवेअरला चांगली मागणी आहे.
व्यापाऱ्यांनी यंदा मोठ्या प्रमाणात पावसाळी साहित्याचा साठा करून ठेवला आहे. पावसाच्या आगमनानंतर मागणी आणखी वाढेल, असा त्यांचा अंदाज आहे. त्यामुळे अनेक दुकानांत सवलतीच्या ऑफरही जाहीर करण्यात आल्या आहेत. गेल्या काही दिवसांत विक्रीत वाढ झाल्याचे व्यापाऱ्यांनी सांगितले.
दुसरीकडे, पाऊस लांबल्याने चिंता वाढू लागली आहे. पाणीपुरवठ्याचे नियोजन, धरणांतील पाणीसाठा आणि आगामी दिवसांतील परिस्थितीवर प्रशासनाचे लक्ष आहे. ग्रामीण भागातही पावसाअभावी पेरण्या खोळंबल्या आहेत. शेतकरी आकाशाकडे डोळे लावून बसला आहे.
यंदा बाजारात फोल्डिंग, ऑटोमॅटिक आणि ‘फाइव्ह फोल्ड’ छत्र्यांना तरुणाईची पसंती मिळत आहे. हलके, टिकाऊ आणि आकर्षक रेनकोटही ग्राहकांचे लक्ष वेधून घेत आहेत. कार्यालयीन कर्मचारी, विद्यार्थी आणि दुचाकीस्वारांसाठी खास रेनवेअरची मागणी वाढली आहे.
उकाडा, दमट वातावरण आणि पावसाची प्रतीक्षा यामुळे नागरिक त्रस्त झाले आहेत. हवामानातील अनिश्चिततेमुळे पावसाची उत्सुकता आणखी वाढली आहे. “आता तरी वरुणराजाने कृपा करावी,” अशीच भावना शहरवासीय व्यक्त करत असून, पाऊस कधी बरसतो आणि खरेदी केलेल्या छत्र्या-रेनकोटचा वापर कधी सुरू होतो, याची सर्वांनाच उत्सुकता लागली आहे.
