पिंपरी-चिंचवड :
हिंजवडीतील आयटी क्षेत्राला हादरवणारी घटना भोसरीत उघडकीस आली आहे. कंपनीतील कथित मानसिक छळ, वारंवार होणारा अपमान आणि वैयक्तिक आयुष्यातील वादातून झालेल्या त्रासाला कंटाळून टीसीएसमधील एका वरिष्ठ कर्मचाऱ्याने आत्महत्या केल्याचा धक्कादायक प्रकार समोर आला आहे. मृत्यूपूर्वी लिहिलेल्या सुसाईड नोटमुळे या प्रकरणाला गंभीर वळण मिळाले आहे. पोलिसांनी दोन महिला सहकाऱ्यांसह तिघांविरोधात गुन्हा दाखल केला असून आयटी वर्तुळात या घटनेची मोठी चर्चा सुरू आहे.
अमित अभय ब्रह्मे (वय ४८) असे आत्महत्या केलेल्या कर्मचाऱ्याचे नाव आहे. त्यांनी २ जून रोजी भोसरी येथील राहत्या घरात गळफास घेऊन जीवन संपविले. घटनेनंतर त्यांच्या कुटुंबीयांवर दुःखाचा डोंगर कोसळला.
मृत्यूपूर्वी अमित ब्रह्मे यांनी सुसाईड नोट लिहून ठेवली होती. या नोटमध्ये त्यांनी कंपनीतील वातावरण, सहकाऱ्यांकडून मिळालेली वागणूक आणि वैयक्तिक पातळीवर झालेल्या त्रासाचा उल्लेख केला आहे. आपण सहन करत असलेल्या मानसिक तणावामुळे हे टोकाचे पाऊल उचलत असल्याचे त्यांनी नमूद केल्याचे पोलीसांच्या तपासात समोर आले आहे.
या प्रकरणी अमित यांचा मुलगा अनिश अमित ब्रह्मे (वय १९, रा. भोसरी) याने भोसरी पोलीस ठाण्यात फिर्याद दिली आहे. त्यानुसार विनोद जेठालाल पालीचा तसेच टीसीएसमधील अर्चना आणि शाश्वती या दोन महिला कर्मचाऱ्यांविरोधात गुन्हा दाखल करण्यात आला आहे.
पोलीसांच्या माहितीनुसार, अमित ब्रह्मे हे टीसीएसच्या डीईजी प्रकल्पात कार्यरत होते. याच विभागातील दोन महिला सहकारी त्यांच्याशी अपमानास्पद वर्तन करत असल्याचा आरोप फिर्यादीत करण्यात आला आहे. त्यांच्या जबाबदारीतील महत्त्वाचे प्रकल्प काढून घेण्यात आले. अपरिचित आणि कठीण कामे देण्यात आली. कार्यालयात वारंवार अपमान करण्यात येत होता. नोकरी सोडण्याचा सल्ला दिला जात होता. कामगिरीबाबत नकारात्मक अभिप्राय देण्याच्या धमक्याही दिल्या जात होत्या, असे फिर्यादीत नमूद आहे.
कौटुंबिक अडचणींमुळेही अमित ब्रह्मे तणावाखाली होते. त्यांच्या पत्नी गंभीर आजाराने त्रस्त असल्याचे सांगितले जाते. घरातील जबाबदाऱ्या आणि कार्यालयातील वातावरण यामुळे त्यांच्यावर मानसिक दडपण वाढत गेले. अखेर ते नैराश्यात गेल्याचा आरोप कुटुंबीयांनी केला आहे.
या प्रकरणातील आणखी एक धक्कादायक बाब तपासात समोर आली आहे. फिर्यादीनुसार, आरोपी विनोद पालीचा याच्या कुटुंबाचा ब्रह्मे कुटुंबाशी परिचय होता. दोन्ही कुटुंबांमध्ये चांगले संबंध होते. मात्र, नंतर कौटुंबिक वाद निर्माण झाला. त्यानंतर पालीचा याने ब्रह्मे कुटुंबाबद्दल मनात राग धरल्याचा आरोप आहे.
या रागातून अमित ब्रह्मे यांच्याविरोधात चोरी आणि फसवणुकीचे खोटे आरोप करण्यात आले. त्यांना कायदेशीर नोटिसा पाठविण्यात आल्या. तसेच त्यांच्या कंपनीच्या अधिकृत ई-मेलवर बदनामीकारक संदेश पाठविण्यात आल्याचेही फिर्यादीत म्हटले आहे. यामुळे त्यांच्या प्रतिमेला धक्का बसला आणि मानसिक त्रास वाढला.
कंपनीतील कथित छळ आणि वैयक्तिक पातळीवरील वाद अशा दुहेरी संकटांचा सामना करताना अमित ब्रह्मे खचत गेले. अखेर त्यांनी आत्महत्येचा मार्ग स्वीकारल्याचा आरोप कुटुंबीयांनी केला आहे.
भोसरी पोलीस ठाण्याचे सहायक पोलीस निरीक्षक केतन मांजरे या प्रकरणाचा पुढील तपास करीत आहेत. सुसाईड नोट, इलेक्ट्रॉनिक पुरावे आणि संबंधित व्यक्तींचे जबाब तपासले जात असून तपासानंतर अधिक माहिती समोर येण्याची शक्यता आहे.
