नांदेडसिटी, पर्वती, कोथरुड, बाणेर, औंध भागालाही बसला फटका
पुणे, दि. १४ मे, २०२६ : महापारेषण कंपनीच्या थेऊर ते मगरपट्टा या २२० केव्ही अतिउच्चदाब वाहिनीत आज (दि. १४) दुपारी १.२० च्या सुमारास तांत्रिक बिघाड झाल्याने हडपसर, मुंढवा, कॅम्प व वानवडीसह परिसरातील वीज ग्राहकांना याचा फटका बसला असून, जवळपास ५० मेगावॅटचे भार व्यवस्थापन कंपन्यांना करावे लागले आहे.
मान्सूनपूर्व देखभाल दुरुस्तीची नियोजित कामे करण्यासाठी महावितरण व महापारेषण या दोन्ही कंपन्यांनी गुरुवारी (दि. १४) सकाळी ७ ते १२ या वेळेत वीजपुरवठा बंद केला होता. दुपारी १२ वाजेच्या सुमारास कामे पूर्ण करुन वीजपुरवठा पूर्ववत करण्यात आला. मात्र काही वेळाने दुपारी १.२० वाजता महापारेषणच्या थेऊर ते मगरपट्टा २२० केव्ही अतिउच्चदाब वाहिनीत बिघाड झाला आणि वीजपुरवठ्याचे गणित बिघडले.
उन्हाचा पारा वाढल्याने विजेच्या मागणीत वाढ झाली असून, बहुतांश वाहिन्या अतिभारीत झालेल्या आहेत. त्यामुळे पर्यायी मार्गाने वीजपुरवठा सुरळीत करण्यास मर्यादा येत आहेत. अशा परिस्थितीत सूक्ष्म नियोजन करुन बऱ्याच भागाचा वीजपुरवठा पर्यायी माध्यमातून सुरळीत करण्यात आला. महापारेषणच्या एनसीएल, कोथरुड व पर्वती या अतिउच्चदाब उपकेंद्रांनाही काही प्रमाणात भार व्यवस्थापन करावे लागले. त्यामुळे नांदेडसिटी, पर्वती, कोथरुड, औंध, बाणेर या भागाच्या वीजपुरवठ्यावर दुपारी परिणाम झाला होता.
रात्री ८ पर्यंत बाधित झालेल्या थेऊर ते मगरपट्टा या २२० केव्ही वाहिनीचे काम पूर्ण होईल आणि त्यानंतरच महापारेषणकडून वीजपुरवठा पूर्ववत होईल. दरम्यान आपत्कालिन परिस्थितीत वीज ग्राहकांनी संयम बाळगून सहकार्य करावे असे आवाहन महावितरणतर्फे करण्यात आले आहे.
