इंद्रायणीच्या प्रवाहातून मृत्यूला हरवून परतली… पुलावरून उडी घेतलेल्या विवाहितेला पीडीआरएफ, पोलीस आणि नागरिकांनी दिले नवजीवन
देहूगाव :
आयुष्याच्या संघर्षाने थकलेल्या एका महिलेने सोमवारी सकाळी इंद्रायणी नदीत उडी घेत जीवन संपविण्याचा प्रयत्न केला. मात्र नियतीला काही वेगळेच मंजूर होते. पोलीस, पीडीआरएफचे जवान आणि काही जागरूक नागरिकांनी जीवाची पर्वा न करता नदीत धाव घेतली आणि काही क्षणांच्या अंतरावर असलेला मृत्यूचा हात मागे ढकलत तिला नवजीवन दिले.
देहूगावातील भैरवनाथ चौक पुलावर सोमवारी सकाळी पावणेसातच्या सुमारास ही घटना घडली. पुष्पा सुरेश गाडे (रा. चव्हाणनगर, देहूगाव) असे या विवाहितेचे नाव आहे.
सकाळची वेळ. पुलावरून वाहणाऱ्या इंद्रायणीच्या प्रवाहाकडे पाहत असताना एका महिलेने अचानक नदीत झेप घेतली. हा प्रकार पाहताच परिसरातील नागरिक हादरले. काही क्षणांतच पोलीस नियंत्रण कक्षाला माहिती देण्यात आली. देहूगाव बीट मार्शलचे पोलीस तातडीने घटनास्थळी दाखल झाले. त्याचवेळी पीएमआरडीएच्या पीडीआरएफ पथकालाही पाचारण करण्यात आले.
नदीच्या पाण्यात महिलेचा शोध सुरू झाला. प्रत्येक क्षण महत्त्वाचा होता. जवान, पोलीस आणि स्थानिक नागरिकांनी एकत्रितपणे नदीपात्रात शोधमोहीम राबवली. अखेर काही वेळातच महिलेला पाण्यातून बाहेर काढण्यात यश आले. त्या वेळी त्या अर्धवट शुद्धीत होत्या.
क्षणाचाही विलंब न करता त्यांना रुग्णवाहिकेतून पिंपरीतील वायसीएम रुग्णालयात दाखल करण्यात आले. डॉक्टरांच्या प्रयत्नांमुळे त्या शुद्धीवर आल्या. सध्या त्यांची प्रकृती स्थिर आहे.
या घटनेने एक महत्त्वाचा संदेश दिला आहे. आयुष्यात कितीही संकटे आली, तरी त्यावर उपाय असतो. एका क्षणाच्या निर्णयाने सर्व काही संपत नाही. उलट वेळेवर मिळालेला आधार आणि माणुसकीचा हात एखाद्याला नवजीवन देऊ शकतो.
इंद्रायणीच्या प्रवाहात हरवण्याच्या उंबरठ्यावर असलेल्या या महिलेसाठी सोमवारी पीडीआरएफचे जवान, पोलीस आणि काही अनोळखी नागरिक हेच खरे देवदूत ठरले.
