प्राथमिक शिक्षक म्हणून काम करत असताना आपल्या कर्तव्याशी एकनिष्ठ राहून तसेच कौटुंबिक जबाबदारी व सामाजिक व पर्यावरणीय बांधिलकी जपत श्री. बाबासाहेब लक्ष्मण काळे यांनी आपल्या अथक परिश्रम, जिद्द आणि चिकाटीच्या जोरावर अखेर पीएच.डी. (डॉक्टरेट) पदवी संपादन करून उल्लेखनीय यश मिळविले आहे.
सावित्रीबाई फुले पुणे विद्यापीठ अंतर्गत अर्थशास्त्र या विषयांमध्ये “आदिवासी समाजातील लोकांच्या आर्थिक व सामाजिक परिस्थितीचा अभ्यास” या विषयावर त्यांनी संशोधन पूर्ण केले. ग्रामीण भागातील पश्चिम भागात स्थित असलेल्या लोकांच्या आर्थिक परिस्थितीचा अभ्यास करत असताना भारतीय अर्थव्यवस्थेवर त्याचा कसा परिणाम होतो, याबरोबरच ग्रामीण अर्थव्यवस्था तसेच आदिवासी अर्थव्यवस्था यांना स्थिर अवस्था प्राप्त करून देण्यासाठी काय प्रयत्न केले पाहिजेत, ग्रामीण व शहरी अर्थव्यवस्थेतील दरी कमी करण्यासाठी अत्यावश्यक उपायोजना व शासकीय उपाय योजना यावर त्यांनी सखोल संशोधन केले आहे. त्यांच्या संशोधन कार्याला डॉक्टर गव्हाळे सर यांचे मोलाचे मार्गदर्शन लाभले. समाजाभिमुख आणि अभ्यासपूर्ण संशोधनामुळे त्यांच्या प्रबंधाचे शैक्षणिक क्षेत्रातून विशेष कौतुक होत आहे. हे संशोधन कार्य करत असतानाच श्री बाबासाहेब काळे यांनी आपल्या नोकरीच्या कार्यक्षेत्रातील अनेक गरजू व गरीब मुले दत्तक घेऊन त्यांचे शिक्षण पूर्ण करण्यासाठी हातभार लावला. त्याचबरोबर आपले कर्तव्य बजावत असतानाच त्यांनी कोणत्याही आवश्यक सुविधा नसतानाही शिक्षणाची जिद्द सोडली नाही. कुटुंबीयांचा आधार, स्वतःची मेहनत आणि शिक्षणावरील निष्ठा यांच्या बळावर त्यांनी आपला प्रवास सुरू ठेवला. नोकरी सांभाळत संशोधन करणे हे मोठे आव्हान असतानाही त्यांनी दिवस-रात्र मेहनत घेत नियत कालावधीमध्ये संशोधन पूर्ण केले. हे याबद्दल पुणे विद्यापीठाच्या अर्थशास्त्र विभाग प्रमुख मा. सुरभी जैन, व्हाईस व्हायवाच्या चेअरमन मा. अमिता यादवाडकर तसेच ग्रंथालय व प्रकाशन विभागाच्या प्रमुख मा. शुभदा नगरकर व विद्यापीठातील विविध विभागाचे विभाग प्रमुख यांनी श्री बाबासाहेब काळे यांनी सादर केलेल्या व संशोधित केलेल्या विषयाचे मनापासून कौतुक केले व शुभेच्छा दिल्या. सामाजिक, आर्थिक आणि शैक्षणिक व पर्यावरणीय विषयांचा सखोल अभ्यास करत त्यांनी संशोधनाला वास्तववादी स्वरूप दिले. संशोधनासाठी विविध भागांमध्ये प्रत्यक्ष भेटी, सर्वेक्षण आणि माहिती संकलनाचे कार्यही त्यांनी मोठ्या परिश्रमाने पूर्ण केले. हे संशोधन कार्य करत असतानाच त्यांनी राष्ट्रीय व आंतरराष्ट्रीय स्तरावर विविध संशोधन पेपर प्रसारित केलेली आहे त्यापैकी उल्लेखनीय म्हणजे “Global Economic Trends” हा आंतरराष्ट्रीय स्तरावर प्रकाशित झालेला तसेच “Rural Development and Self Empowerment: Issues and Challenges” हा राष्ट्रीय स्तरावर प्रकाशित झालेला संशोधन पेपर संशोधनाला नवी दिशा देणारा आहे.
त्यांच्या या यशामुळे केवळ कुटुंबाचाच नव्हे तर संपूर्ण परिसराचा गौरव वाढला आहे. विशेषतः ग्रामीण भागातील विद्यार्थी, स्पर्धा परीक्षा देणारे युवक आणि उच्च शिक्षण घेणाऱ्या विद्यार्थ्यांसाठी त्यांचा संघर्षमय प्रवास प्रेरणादायी ठरत आहे.
श्री. बाबासाहेब लक्ष्मण काळे हे पिंपरी चिंचवड शहरातील रहवासी असून त्यांच्या या यशाबद्दल शैक्षणिक, सामाजिक, राजकीय तसेच विविध क्षेत्रातील मान्यवरांकडून अभिनंदनाचा वर्षाव होत आहे.
“परिस्थिती कितीही कठीण असली तरी जिद्द, परिश्रम आणि शिक्षणावरील विश्वास यांच्या जोरावर कोणतेही ध्येय गाठता येते,” हे त्यांनी आपल्या यशातून सिद्ध करून दाखविले आहे.
