पिंपरी-चिंचवड :
जुलैच्या सुरुवातीलाच पावसाने दमदार हजेरी लावताच पिंपरी-चिंचवडमधील छत्री आणि रेनकोटच्या बाजाराला अक्षरशः उभारी मिळाली आहे. पहिल्याच मुसळधार पावसाने नागरिकांची धावपळ उडाल्यानंतर आता बाजारपेठांमध्ये पावसाळी साहित्य खरेदीसाठी मोठी गर्दी होत आहे. त्यामुळे काही दिवसांपासून मंदावलेला बाजार पुन्हा गजबजून गेला आहे.
यंदा मान्सून उशिरा दाखल झाल्याने व्यापाऱ्यांना विक्रीची प्रतीक्षा करावी लागली होती. मात्र, गेल्या काही दिवसांतील जोरदार पावसानंतर पिंपरी कॅम्प, चिंचवड, भोसरी, निगडी, आकुर्डी, वाकड, सांगवी आणि पिंपळे सौदागर येथील बाजारपेठांमध्ये ग्राहकांची मोठी वर्दळ दिसून येत आहे. अनेक दुकानदारांनी नव्या डिझाइनच्या छत्र्या आणि रेनकोटचे स्टॉल रस्त्यालगत उभारले आहेत.
शाळा सुरू असल्याने पालकांकडून मुलांसाठी रंगीबेरंगी छत्र्या आणि आकर्षक रेनकोटची खरेदी मोठ्या प्रमाणावर होत आहे. कार्टून पात्रांच्या छत्र्यांना मुलांची विशेष पसंती मिळत आहे. नोकरदार महिला आणि दुचाकीस्वारांकडून पूर्ण शरीर झाकणारे तसेच मिडी पॅटर्नचे रेनकोट अधिक पसंत केले जात आहेत. व्यावसायिक आणि डिलिव्हरी कर्मचाऱ्यांकडूनही दर्जेदार रेनवेअरची मागणी वाढली आहे.
यंदा कच्च्या मालाच्या किमती आणि वाहतूक खर्च वाढल्यामुळे छत्री व रेनकोटच्या दरात सुमारे १० ते २० टक्क्यांनी वाढ झाली आहे. साधे रेनकोट ३०० रुपयांपासून उपलब्ध आहेत. ब्रँडेड रेनकोटची किंमत एक हजार रुपयांहून अधिक आहे. छत्र्यांचे दर १५० रुपयांपासून सुरू होत आहेत.
दर वाढले असले तरी खरेदीचा उत्साह कायम आहे. पावसात भिजून आजारी पडण्यापेक्षा दर्जेदार छत्री किंवा रेनकोट खरेदी करणे अधिक योग्य असल्याचे ग्राहक सांगत आहेत. हवामान विभागाने पुढील काही दिवस जोरदार पावसाचा अंदाज वर्तविल्याने पावसाळी साहित्याच्या विक्रीत आणखी वाढ होईल, असा विश्वास व्यापाऱ्यांनी व्यक्त केला आहे. त्यामुळे शहरातील पावसाळी बाजारपेठांमध्ये सध्या चैतन्याचे वातावरण निर्माण झाले आहे.
