मुंबई : मुसळधार पाऊस आणि जोरदार वाऱ्यामुळे मुंबईतील दादर रेल्वे स्थानक परिसरात बुधवारी एक मोठी दुर्घटना घडता घडता टळली. दादरमधील गजबजलेल्या रस्त्यावर उभ्या असलेल्या एका कारवर मोठे झाड कोसळल्याने वाहनाचे मोठे नुकसान झाले.
प्रत्यक्षदर्शींनी दिलेल्या माहितीनुसार, पावसासोबतच वादळी वाऱ्याचा जोर वाढल्याने झाड अचानक कोसळले. झाड थेट कारवर पडल्यामुळे वाहनाचा पुढील आणि वरचा भाग चांगलाच चुराडा झाला. मात्र, सुदैवाने या घटनेत कोणतीही जीवितहानी किंवा गंभीर दुखापत झालेली नाही.
घटनेची माहिती मिळताच अग्निशमन दल, बृहन्मुंबई महानगरपालिका (BMC) आपत्ती व्यवस्थापन विभाग आणि संबंधित यंत्रणांचे पथक घटनास्थळी दाखल झाले. झाड हटवून रस्ता वाहतुकीसाठी मोकळा करण्याचे काम युद्धपातळीवर सुरू करण्यात आले.
मुंबईत मान्सून सक्रिय झाल्यानंतर अनेक भागांत मुसळधार पाऊस सुरू असून, जोरदार वाऱ्यामुळे झाडे कोसळण्याच्या घटनांमध्ये वाढ होत आहे. त्यामुळे नागरिकांनी सावधगिरी बाळगावी आणि आवश्यक नसल्यास पावसाच्या काळात झाडांखाली वाहने उभी करू नयेत, असे आवाहन प्रशासनाकडून करण्यात येत आहे.
